Relaciona cu e yobida fuerte cu Aruba a ricibi for di ayera nochi y awe mainta, a tuma contacto cu Servicio Meteorologico (Meteo) pa un update riba e situacion di tempo. For di algun dia caba a avisa di posibel yobida fuerte den nos area. Ta menciona hopi humedad/ instabilidad culminando ayera nochi y den oranan di marduga den yobida fuerte. A registra 17.8 mm di awa den e ultimo 24 oranan compaña pa strena cu lamper.
Tin cu corda cu nos ta den un temporada d yobida, esta lunanan di October/November y December y cu posibilidad cu den luna di Januari tambe lo por haya poco awa. Diferente ola tropical den nos region, como tambe disturbionan na nivel abou ta influencia e tempo y cualkier instabilidad/ humedad por trece awasero pa nos islanan.
No ta sigur si den e siguiente dianan lo por spera e mesun tempo pero teniendo na cuenta cu ta temporada di awasero, no por descarta yobida, aunke cu den e proximo 24 oranan si por keda pendiente pa un poco mas awasero. Medida di precaucion lo ta consehabel pero esaki ta keda na cada cas dependiendo con vulnerabel nan ta den situacion di yobida fuerte.
