Ciudadanonan a rabia masha hopi na momento cu a mira con na un beach cu santo blanco na waf di chikito a simplemente basha un truck di santo bruin contaminando henter e beach.
E area aki unda botonan ta ancra tin un beach chikito masha bunita mes. P’esey piscadonan a keda hopi sorprendi na momento cu bakinan poni pa evita entrada di vehiculonan, a kita nan y un truck a basha santo bruin riba e beach. Algo inusual y incomprendibel.
E beach aki ta cay bou responsabilidad di APA y a resulta cu nan no tabata na altura mes di loke a pasa y na e momentonan ey no tabata sa cual ta e contratista cu a haci esaki y pa ki motibo, Inmediatamente despues di a tuma nota di e noticia aki, APA a para movecion di e vehiculonan y a cuminsa un investigacion.
Personal di DOW tambe a yega na e sitio y a haya ordo di hefenan cu e contratista no mag recoge e santo cu nan ta bay confisca te ora cu haya sa kico a pasa. Dado momento tabatin un discusion entre personal di DOW y Arubaanse Wegenbouw cu kier a bay cu e santo bek y mester a blokia e caminda pa evita cu nan ta subi riba e beach un biaha mas cu nan vehiculonan pisa.
