Situacion na KIA ta pa falta di comunicacion entre gerencia y trahadonan, esaki ta loke cu Minister di Husticia Andin Bikker a bisa despues di e reunion diamars atardi cu miembronan di staf di KIA, representantenan di sindicato TOPA y sindicato SEPPA tratando pa yega na palabracion despues cu a surgi malcontento di e trahadonan di KIA.
Manera ta conoci, e trahadonan den oranan di diamars merdia a tene un reunion pafo di e instituto pa asina expresa nan disgusto. Minister Bikker mesora a tuma nota di esaki y a invita nan pa un reunion cu a tuma luga na Bestuurskantoor pa 3’or. Despues di e reunion, Minister Bikker a declara cu e reunion a bay den un bon ambiente unda por a sinti cu e malcontento cu a bin di parti trahadonan di KIA ta debi na medidanan y decisionnan tuma siman pasa pa leiding di KIA pa proteccion den cuadro di Coronavirus.
Tabatin diferente falta di comunicacion y esey a pone cu cierto cosnan a escala cu mester a bay over na prohibicion di entrada di BOT K-9.Minister Bikker siman pasa a papia cu representantenan di sindicato TOPA, sindicato SEPPA, trahadonan y representante di BOT K-9 unda por a haya hopi claridad.
Cu e reunion aki Minister Bikker por a conclui cu tin falta di comunicacion y tambe a haci un apelacion na DRH pa ta presente diaranson mes pa na mesa sinta scucha e banda di medaya di e team di BOT K-9. Cu e reunion aki por yega na un reevaluacion pa loke ta e prohibicion di entrada di BOT K-9 na KIA y asina trece pas laboral den esaki.Pa loke ta e reunion di 1 ora pafo di e instituto diamars merdia, Minister Bikker a adresa esaki den e reunion unda a bin diferente punto dilanti.
E mandatario ta kere cu despues di e reunion cu DRH, mesora mester cuminsa dal e stap den e direccion di comunicacion pa loke ta trata BOT K-9 pa yega na un solucion di e situacion cu a presenta pa nan por reactiva.E otro preocupacion di e trahadonan di KIA mes ta e “maaltijdbonnen” y e decision cu leiding a tuma cu nan ta haya cu mester a consulta cu e trahadonan prome. Diahuebs 11’or Minister Bikker lo bay tene reunionnan intensivo pa mehora y optimalisa e liñanan di comunicacion y tur esaki den interes general y bienestar di pais Aruba.