Glenn Thode ta rector di Universidad, pero awo e ta tambe presidente di Conseho Electoral pa dia 22 di September, 2017. P’esey a acerk’e, pasobra tin preparacion cu tin cu tuma luga pa e proximo temporada, prome cu entregamento di lista cu algun exigencia.
El a splica cu dia 17 di Juli, el a asumi e rol di presidente di Conseho Electoral. Esey tambe ta fungi e Conseho Supremo Electoral. El a gradici sr. Hubert Maduro, kende tabata e presidente anterior, pa su servicio na comunidad riba e tereno aki. Thode ta contento toch e ta sigui cu su conocemento y experiencia como vice presidente di e organonan cu Thode ta presidi.
Entregamento di lista
Ta berdad ta bay yega entregamento di lista. A caba di publica ki dia esaki ta. E lo bay ta dia 4 di Augustus. Ta asina cu en principio tin un ora stipula den ley ki ora e partidonan por acerca e conseho Supremo Electoral pa entrega lista. Si pa cana ordena, a manda carta pa e partidonan bin na un forma ordena y structura durante e dia eynan. A pidi nan pa nan tambe tene nan mes na e rooster cu lo propone na nan, na modo cu nan ta yega na e ora stipula pa e conseho. Pa e dia eynan, cada partido lo mester bin cu e lista. Lo mester tin un potret. Esaki ta stipula tambe den ley y ta den e carta tambe cu a manda pa e partidonan. Mester tin un potret blanco cu preto cu apariencia ta hopi specifico. Cu un parecido exacto di e persona cu ta e lider di e lista. Tambe mester presenta cu un pago di Directie Financien. Ora cu e partidonan por demostra e puntonan aki, e ora ta tuma esaki, duna un comprobante. Despues di esey, e siman cu ta sigui, mirando cu ta riba diabierna, ta e periodo pa esnan cu tin derecho di voto, pa duna sosten na e partidonan cu ta rekeri esaki pa ley. E ora eynan, despues di esey ta bay den e proceso pa controla tur cos y stipula en berdad si e listanan ta balido, ta cumpli cu tur rekisito. Un parti hopi importante pa cumpli tambe ta, cu cada persona cu ta aparece riba e lista, mester a bay di acuerdo cu nan ta aparece, cu nan ta candidato riba e lista aki. Pa esey mester tin un declaracion di nan banda. Tin un formulario pa e declaracion aki cu tin como standart. E lo aparece riba e website di Censo. Ta pidi tambe cada hende cu ta bay ta ser postula como candidato, nan por bishita e website di censo, si nan no sa ainda, of si nan no tin e papel aki, di modo nan por download’e y print’e di modo cu nan por duna e firma cu nan ta di acuerdo cu nan ta riba e lista.
