“Mi prome reaccion ta cu nos ta bay bek den tempo, 40 pa 50 aña y cu mi ta hopi preocupa cu nos no por desaroya e sector medico na Aruba mas”, asina e Cardiologo, Dr. Casper Lacle, a bisa awe nochi durante un entrevista cu 24ora.com. El a repasa e condicionnan cu Gobierno di Hulanda a pone riba mesa pa Aruba por haya un fiansa urgente di 204 miyon florin. Ey e ta nota den e plannan pa bin cu un solo Hospital pa e islanan den Caribe Hulandes, cu 4 locacion na e islanan y den cual tin un central cu ta cumpra tur cos.
“Y nos sa cu ora Hulanda menciona cu nos ta regl’e centralmente, e ora nos sa mesora cu central kiermen Corsou, pues cu Corsou ta bay regla tur cos, pues mi ta preocupa cu e situacion aki”, asina e Cardiologo a duna di conoce. E mes tin 24 aña caba trahando como specialista di curason riba nos isla y e ta contento di menciona cu nos isla a sa di desaroya hopi bon riba tereno medico y lo ta un lastima pa nos bay centralisa tur cos bek den forma di un Antias nobo.
Dr. Casper Lacle a menciona cu henter e industria di cuido medico na Aruba tin plannan grandi, di cual algun parcialmente ta ehecuta caba y otronan cu ta den pipeline. Cu e maneho nobo aki for di Den Haag, lo frustra tur e ideanan briyante aki. Entre otro, despues di hopi aña tratamento di cardiologia mes a desaroya masha bon mes. Awendia ta pone stent of ballon den adernan cera, en bes di manda centenares di pashent den exterior. Un otro desaroyo ta habrimento di centro di radioterapia na IMSan, den cual ta yuda hopi pashent di cancer na Aruba mes en bes di manda nan afo.
Corsou y Aruba ta ofrece e mesun servicionan
Awo ta bin e problema; Corsou tambe ta ofrece servicio di radioterapia. Nan tambe tin un centro di cardiologia, aunke cu Dr. Lacle ta kere cu esun di Aruba ta mas desaroya cu esun di Corsou, pero asina mes, awor cu Hulanda kier evita cosnan dobel, lo por nifica cu un mester cera! Dor di cu nos mester manda nos pashentnan pa Corsou ta duna nos un sentimiento di Antias atrobe, locual nos a kita for di dje na aña 1986.
“No ta pornada a bin henter un bataya cu a culmina den un Status Aparte. Ami ta corda con Aruba tabata prome cu Status Aparte y mi por compara con nos a desaroya despues. E desaroyo economico y prosperidad comparti, mi ta sigur cu nos lo no a hay’e si nos a keda den e constelacion prome”, asina e specialista a splica, cu un bos preocupa.
Hospital di Aruba ta den problema serio actualmente
E “hacking” di e sistema digital di nos Hospital, sigui pa Covid-19, despues pa candela su tras y comosifuera poco a bin acerca e retonan cu asbest cu a plama den e edificio bieu di Hospital, un lista di sin fin di retonan cu e entidad aki ta confrontando, cu un limitacion di recurso financiero, recurso humano y ekiponan pa por maneha cuido medico memey di un pandemia, manera cu nos tin awor. “Hulanda por duna nos un man. Ta berdad cu nos ta den un crisis, pero tene cuenta cu prome cu e crisis di Corona nos tabata maneha. E cosnan no ta perfecto pero mester wak e bigger picture. Si bo ta mira un Aruba na 1986 unda nos entrada a cay completamente cu cierre di Lago y toch nos a desaroya un pais despues, kiermen nos a demostra nos por”, asina e specialista a enfatisa. Mi no ta bisa cu nos no mester di ayudo. Pero si Bo mira con e Coronavirus a afecta paisnan grandi manera Francia, Spaña, Italia, kiermen tur hende ta afecta awor aki, no ta nos so.
Dr. Lacle: Gobierno no firma….no give-in
Na final, Dr. Casper Lacle a bisa cu si e por conseha Gobierno di Aruba den e situacion aki, e ta bisa nan “Mi no ta bisa cu e situacion ta facil, e ta duro y mi ta kere cu nos mester sacrifica, nos tur lo mester sacrifica. Pero ami lo haya hopi jammer si nos entrega nos autonomia. Ami por bisa den un palabra, hold tight y sigui negocia pero no give-in like that“.
