Den entrevista cu Natasha Jean awe tardi por a compronde un poco mas riba e situacion cu e ta pasando aden cu peticion di alargacion (verlenging) di e ayudo cu gobierno a duna FASE.
Locual Natasha a conta ta cu e tabata wardando riba e placa pasa y riba e fecha stipula esaki no a pasa. Un colega a tuma contacto cu ne pa avise cu e placa a pasa. A bay banco pero a tuma nota cu riba su cuento no a pasa nada ainda.
Na momento cu dialuna a drenta y no a ricibi nada ainda, a cuminsa manda email, haci yamada pero niun caminda no tabata ricibi contesta. E momento ey Natasha a tuma desicion di presenta te na parlamento, a dun’e instruccion pa bay bestuurskantoor caminda el a pidi telefoon di secretaria di minister di labor. Mes momento a conseh’e pa pasa DPL pa wak si nan por yud’e eynan.
Na DPL a tuma tur su datonan y indicando cu nan lo tuma contacto cu ne via telefoon. Awe ta dia 10 di september y te na e momento aki no a ricibi niun yamada.
Natasha a remarca cu den su aplicacion a tuma nota di un eror na momento di yega e informacion y cu ta pa e motibo aki e tabata tuma contacto cu e instancia pa coregi e eror aki pa no presenta tardansa pa cu su ayudo di FASE. Lamentablemente no a yega den contacto cu ningun hende y awe su ultimo recurso ta pa yama prensa y haci un peticion na cualkier instancia cu tuma nota di e yamado aki, pa tuma contacto cu ne y brind’e e yudansa cu e ta sperando riba dje.
Situacion ta hopi dificil y ta pidi pa gobierno, instancianan tene na cuenta cu comunidad ta purba comunica y no ta haya atencion ni yudansa for di e instancianan netamente encarga cu e situacion aki. Un mensahe ta bay na tur pa porfabor atende cu e comunidad cu ta sin trabou, sin entrada y ta conta cu e ayudo aki pa por cubri lo minimo pa sobrevivi e crisis aki.
