Diaranson Centro di Bario Playa Pabou tabata di fiesta. E comision 60+ a uni bek despues di dos aña di pandemia.
Dennis Burke, presidente a splica cu esaki ta un comision cu tin como meta organisa actividad pa 60+, no solamente pa Playa Pabou, pero pa Aruba completo. Tur persona di tur bario di Aruba por participa.
Annie Kock, miembro di Comision 60+ , a splica cu e comision ta encarga cu e programa pa ful un aña. Eyden nan ta hinca tur nan actividadnan, cual ta varia. Si nan keda na e Centro di Bario Playa Pabou nan ta haci seso sport y obra di man. Pero tin ora nan ta sali bay keiro tambe den bus.
Kock a relata cu e miembronan ta gusta esaki masha hopi mes, sea nan ta bay casino cu ful e grupo. Esaki ta algo hopi bon pa e miembronan ya cu nan ta haci actividadnan sano y tambe nan ta mantene nan mes activo.
Hopi di e grandinan ta biba nan sol, nan ta isola. P’esey esun cu kier bira miembro, tur ta bonbini. Sea ta dama nan so, e cabayeronan so tambe. Sin laga afo nos parehanan pensionado. Tur ta mas cu bonbini.
Pero no ta solamente personanan di 60 aña por bira miembro, pero tambe esunnan cu ta mas jong tambe cu lo kier ta activo riba tereno social of kier ta activo den grupo, pa haci actividad, cera conoci cu otro hende, esaki tambe ta posibel.
Si bo ta sinti cu bo ta cla pa forma parti di e grupo aki, pasa libremente na Centro di Bario Playa Pabou y busca mas informacion.
