Diahuebs mainta, despues di mas cu cuater aña, ta tuma luga tratamento di e caso penal di e 46 baranan di oro. Den e caso aki tin dos persona acusa di falsificacion y contrabanda di oro. E acusadonan den e caso aki ta Rafael Gonzalez Zambrano y Juan Carlos Toro Rodriguez, ambos residente di Aruba.
E caso aki a tuma luga dia 9 di februari 2018 na momento cu e cargamento di 46 bara di oro a yega Aruba riba un vuelo. Aki a baha e carga y a lag’e den man di Duana te ora cu a yega momento pa abordo e vuelo di KLM rumbo pa Hulanda y for di eynan mester a bay Dubai pa entrega e oronan.
Tur cos a bay normal, supuestamente y e persona cu ta escolta e oro, manera semper, tabata abordo caba ora cu funcionarionan di RST a para e avion y a baha Zambrano y e oro for di e avion. A informa e persona aki y otro persona cu ta intermediario cu e doñonan cu nan ta deteni pa falsificacion di documento, traha door di un broker y contrabanda di oro. E investigacion den e caso a alarga cu tempo y na momento cu e tratamento tuma luga diahuebs mainta, a pasa 4 aña, cuater luna y 12 dia.
Segun por a compronde y ta increibel, cu despues di tanto tempo a pasa, ta apenas dos dia prome cu e tratamento, a saca e acusacion contra e dos personanan ariba menciona, cu den Corte lo wordo representa pa abogadonan Peppi Sulvaran di Corsou y Peter Mohammed di Aruba. Corte a tuma henter mainta pa trata e caso aki.
