Minister Andin Bikker a nombra e prome Altocomisario femenino na Aruba

4356

Despues di a fungi pa varios aña como Comisario y full time suplente desde maart den funcion di Alto Comisario interino di Cuerpo Policial Aruba, awe Conseho di Ministro bay di acuerdo cu proposicion di minister mr. Andin Bikker pa nombra Alto Comisario suplente Vanessa Kock oficialmente den e funcion permanente di Alto Comisario di Polis. Mr. Andin Bikker a haya necesario pa nombra un Comisario permanente pa stabilidad di e Cuerpo, pa por sigui enfrenta entre otro e crisis di Corona-virus y mantene orden publico.

A consulta varios ex-Comisario y ex-mandatario di Husticia cu amplio experiencia riba e tema y tur a expresa di ta di acuerdo cu esey lo ta e miho decision bow di e circumstancianan actual. Comisario Vanessa Kock a demostra liderazgo precisamente den momento di crisis cu nos pais ta aden, tanto pa mantene e Cuerpo Policial operando y di otro banda garantisa orden publico na tur ciudadano y bishitante riba nos isla.

Minister Andin Bikker ta contento cu su funcionamento di e ultimo añanan como Comisario, mientras e tabata den e funcion suplente na varios ocacion y despues di maart cu el a keda na cabes di e organisacion asina importante pa siguridad di nos Pueblo y nos bishitantenan.

Ademas e ta e prome Alto Comisario femenino den historia di Aruba. Cu esaki awo henter e top di polis, pues tanto e AltoComisario como e demas Comisarionan, tur ta ser femenino.

Vanessa Kock a studia pa Inspector di Polis na Appeldoorn, Hulanda y tin un trayectoria largo den Cuerpo Policial y pa hopi aña ta den e rango di Comisario. Como cu na varios ocasion el a ocupa e funcion di Alto Comisario suplente y ta miembro di e Korps Management Team, e tin un amplio experiencia den un funcion ehecutivo den top di Cuerpo Policial.

Cuerpo Policial Aruba ta existi desde aña 1986. Ta un di e departamentonan di Gobierno di mas grandi di nos pais, cu entre otro personal specialisa, edificio accesibel den tur districto, unidad motorisa y maritimo, radar y helicopter na nan disposicion.