Comerciantenan y bisiñanan cu ta biba den Companashi ta fada di e situacion cu nan ta pasa aden, specialmente den temporada di yobida. A organisa un accion door di haci trabounan di limpiesa pa mantene e pasada di awa limpi den e canal di Companashi band’i santana di gobierno bay direccion lama.
Ta un situacion fastioso pa nan, pasobra mas cu un biaha nan ta haci e area limpi. DOW tambe sa haci e area aki limpi. Pero tin bisiña den e area cu ta actua di forma iresponsabel. Ta corta mata y benta nan den e pasada di awa den e rooi. Esunnan cu ta haci esey ta lubida riba e yobidanan cu ta biniendo Aruba den e temporada di fin di aña.
Consecuentemente diabierna ultimo ora awa a basha, tur mata cu bisiñanan di Edisonstraat a corta, a causa cu henter e sistema a tranca y pega cu sushedad cu nan a benta of cu tabata benta na rand di e rooi. Esaki no ta un forma responsabel pa traha, pasobra ora di corta matanan mester kita nan for di e rooi. Como bisiña esaki ta causa un problema pa otro bisiña, pa motibo cu awa no por bay y sigui su caminda. Loke a corta, awa ta lastr’e y ta pega den e pasada di tuberia, etc. pa stroba e pasada di e rooi pa caminda.
Diasabra trempan comerciantenan den bisindario a bay den accion y un biaha mas a haci e rooi limpi. Na diferente ocasion nan a tene henter e rooi y area limpi. Un biaha mas mester a limpia sushedadnan di otro bisiñanan cu no ta actua responsabel y ta spera cu esaki ta un les. P’esey ban tene e rooinan limpi, si haci limpiesa no benta sushi den rooi. Esaki ta crea un problema pa otro bisiña, pasobra abo no lo gusta cu otro bisiña benta sushi y causa problema p’abo.
