Centro di Coordinacion pa asuntonan di Traficacion y Contrabanda di Hende (CMMA) ta e punto central pa tur cos cu ta relata na e crimen di Traficacion di Hende (Mensenhandel) y Contrabanda di Hende (Mensensmokkel) na Aruba. CMMA ta existi pa ricibi y duna informacion, educa pueblo door di training y campaña y asisti e victimanan di traficacion.
For di 2007 gobierno di Aruba a declara cu e bataya contra Traficacion y Contrabanda di Hende ta hopi importante y na aña 2008 Aruba a haya su Coordinador Nacional contra Trafficacion y Contrabanda di Hende. A haci hopi progreso y Aruba a logra mas cu un reconocimento internacional pa e trabounan cu CMMA a haci na beneficio di combatimento di e crimennan aki. A crea un Taskforce pa duna gobierno di Aruba conseho y un unidad specifico na KPA pa investiga casonan.
CMMA kier introduci su mes cu un ‘jingle’ cu ta splica ken nos ta, kico nan ta haci y con por comunica cu nan. E jingle ta traha p’e conoci Janiro ‘Ataniro’ Eijsden y ta publica via social media. “Hunto nos por logra combati e tipo di crimen aki ariba nos dushi Aruba.” Por comunica cu CMMA via E-mail: [email protected] of via Facebook. Pa cualkier pregunta por contact 5975223 (oranan di oficina) y pa yudansa urgente por contact 5923231 (hotline 24/7).
