Club Kibrahacha ya pa 33 aña den comunidad, ta un centro di actividad, caminda cu e enfoke ta pa purba di mantene e hendenan di 60+ activo den comunidad.
Segun Jeffrey Matos, esaki ta tanto activo mentalmente, pero tambe riba e sector social. Embehecimento ta un fenomeno cu mundialmente ta conoci y Aruba no ta keda afo pa e parti aki. E rol cu e fundacion ta hunga den e comunidad pa esey, ta hustamente pa stimula e hendenan pa keda activo.
Matos ta pensa cu hendenan cu ta bira grandi di edad, of yega edad di pensioen, hopi biaha ta retira y no tin un plan pa sigui kico ta bay haci despues. Como centro di actividad ta bisa cu ta importante pa planea con bo ta bay cu pensioen y bo ta keda activo den comunidad.
Como isla, ora cu gruponan grandi cu baha cu pensioen, manera cu e ta bayendo actualmente, ta perde hendenan cu hopi conocemento y experiencia den comunidad. Pesey, como fundacion Club Kibrahacha kier stimula nan, pa sea keda activo riba e parti voluntario, pero alabes keda activo caminda cu nan mes ta haci actividadnan social den nos comunidad.
Na Aruba tin diferente grupo di actividad pa 60 plus activo, cual sigur, Club Kibrahacha como fundacion y DVG ta sigui stimula e hende grandinan, pero alabes ta mira cu tin un grupo grandi cu no ta activo.
Esey ta e gruponan cu kier enfoca riba dje e siguiente añanan. Pesey tambe, como fundacion, hunto cu Universidad di Aruba y Departamento di Salud Publico, ta bay haci investigacionnan pa por yega na e gruponan aki pa asina por stimula nan pa nan participa den nos comunidad.
Tambe kier enfoca riba e parti caminda cu ta acerca e gruponan aki prome cu nan baha di pensioen, prome cu yega na nan edad, pa asina por concientisa nan, pa ta importante pa ta activo.
Matos a splica cu e tin un amigo kende ta bisa cu no ta papia di retire, sino di rewire. Ta bay haci algo diferente na momento cu baha cu pensioen y bida ta sigui.
No ta pone un paro eynan, pero ta sigui den un otro forma. Esey ta loke cu e fundacion kier enfoca hopi riba dje, hunto cu Departamento di Salud Publico, seccion di Ouderenzorg, caminda ta kere cu tin cu activa e hendenan. Pero alabes ta conciente cu tin retonan tambe, manera e accesibilidad na diferente luganan publico, transporte ta hopi importante como isla. Ta prepara pe pa e hendenan cu ta bira grandi, pa nan keda participa den comunidad.
Esnan cu ta join Club Kibrahacha
Como fundacion, Club Kibrahacha tin 38 voluntario, cu ta yuda haci tur trabao. Sigur por mira un cambio den e personanan cu tin basta testimonio di hendenan, cu ta bisa cu despues cu a cuminsa na Club Kibrahacha, por mira cu tin un cambio den nan bida. Tin hendenan cu a haya stroke, ta sinti cu ta comunica cu mas hende.
Kico e meta di e club ta, pa evita pa e hendenan cay den soledad. Isolacion social ta esun mas negativo cu ta impacta bida di un hende, na momento cu nan ta baha cu pensioen. Hopi biaha nan yiunan ta bira grandi y bay for di cas. E red social di nan ta bira hopi mas small. Nan tin menos contacto mientras cu e edad ta subi.
Hustamente esey ta loke cu e organisacion kier stimula pa nan tin contacto cu mas persona.
Tin ehempel den e fundacion mes. Nan tin un voluntario cu tin 33 aña activo den e fundacion. E dama awor aki tin 93 aña y ainda ta activo.
Club Kibrahacha y DVG ta bay haci investigacion y kier sa kico e hendenan ta haci. Ta importante pa sa cu na momento cu un persona cu baha cu pensioen, unda e ta bay forma parti. Tin cifranan cu ta bisa cu tin un cantidad grandi cu ta keda activo den e sector laboral, cual ta hopi positivo.
Tin un grupo cu ta bay haci actividadnan social. Pero tin un grupo grandi cu no sa kico nan ta haci. Tin e grupo naturalmente cu ta den casnan di cuido, cu tin mester di esaki. Tin un grupo hopi grandi cu segun Matos, e cantidad di personanan di 60+ na Aruba, ta segun Censo algo mas cu 23 mil den nos comunidad.
Ta un porcentahe basta grandi di esey cu ta activo, pero no sa kico exactamente nan ta haci.
Tur dia Club Kibrahacha ta activo cu e grandinan. E infrastructura ta duna e facilidad ey tambe, caminda diariamente, di dialuna pa diabierna, tin diferente actividad. Tin actividad di movecion, tin les di computer, tin tayernan cu ta duna, hendenan por haci obra di man, ta hunga bingo y tin di nan ta hunga domino.
Nan tin escogencia den diferente tipo di actividad cu nan ta haci na e Centro. E ta un concepto cu fundacion pa nos grandinan, Club Kibrahacha tin pa 33 aña, cu ta un concepto riba su mes y ta ofrece transporte tambe pa e personanan.
Como centro di actividad, kier stimula nan pa nan keda activo. Pero alabes, ta kere cu nan mester ta liber pa nan scoge loke nan kier haci. Tin un gran cantidad di actividad, pero esun di mas importante ta e contacto social, unda cu nan mes ta cera amistad, nan ta topa cu otro persona y eynan ta crea un conexion cu un otro hende y e contacto social, e netwerk ta keda toch riba un manera hopi stabil, segun Matos.
