Awe mainta trempan, recherchenan di Landsrecherche a bishita nos colega Nelson “Speed” Andrade na su cas ma Kamay y a detene, relaciona cu scuchamento di radio di Polis. Na mes momento autoridad a bay na cas di e agente di Polis, Kenneth Rasmijn na Rooi Afo, pidiendo pa e meld su mes 8:00am na Landsrecherche.
Na cas di Andrade no a efectua “huiszoeking” pero a bay cune pa interogacion. Su detencion no ta nifica automaticamente encarcelacion. Esaki ta di 4 detencion cu ta efectua den e mesun caso aki, unda ta sospecha cu Polisnan a facilita prensa cu radio pa scucha ora tin accidente.
Mester menciona cu den caso di 24ora.com, no a haya ningun radio di Polis. A detene nos colega Marko Espinoza, a bishita varios cas pero sin resultado. Ta hopi obvio e ora cu e caso ta mas bien persecucion politico y for di prome instante tabata sa cu e “target” principal ta Nelson Andrade!
