E programa OGM na Universidad di Aruba a sigui cu su tradicion di organisa un evento di clausura y un evento social. E tradicion a cuminsa na 2011 pa studiante y docente por refleha y duna nan opinion riba e calidad di e programa di OGM.
Durante e evento di clausura, e studiantenan ta duna feedback tocante diferente aspecto di e organisacion di e programa y tocante diferente temanan pa mehora e estudio. Tambe studiantenan ta wordo informa tocante e cambionan den e curiculo y nan ta ricibi tips di kico pa spera den e aña academico nobo. 
Un grupo di studiante di segundo aña a presenta nan proyecto pa ‘Community Project and Project Management’ na e otro studiantenan present. Esaki ta un curso cu ta ser duna den e segundo aña di OGM unda cu e studiantenan ta organisa y implementa un proyecto social na Aruba durante Aruba Doet. E studiantenen di tercer y cuarto aña tambe a comparti nan experiencia durante nan pasantia y nan experiencia culminando nan tesis final.
Durante final di e evento di clausura, studiantenan a haci un tarea creativo pa refleha riba e aña academico y nan desaroyo personal. 
Por medio di un ‘bookmark’ nan mester a expresa nan experiencia y nivel di satisfaccion cu nan prestacion den e aña academico 2018-2019. Tambe nan a expresa nan meta personal pa futuro por medio di mensahe positivo riba nan ‘bookmark’. E evento social despues a tuma lugar anochi na On the Rocks. Eynan den bon ambiente a tuma despedida di aña academico 2018-2019. E studiantenan a celebra tur nan exito y a yama bon bini na e vakantie tan spera. E team di OGM kier a felicita tur studiante di Universidad di Aruba y tambe di Aruba cu a bay over y specialmente esnan cu pronto lo gradua.
Pa mas informacion tocante registracion por pasa na e oficina di asuntonan di studiante (OSA) na Universidad di Aruba na J. Irausquin Blvd. banda di Crown y Kong Hing. Tambe por yama OSA na 5262257 of manda un e-mail na [email protected]
Pa mas informacion tocante e estudio di OGM por bishita e pagina di web di Universidad di Aruba http://www.ua.aw/OGM. Tambe por “like” e pagina di Facebook di OGM pa keda informa over di OGM.
