Clark Abraham di Partido Demokrátiko Boneriano, ta un di e politiconan popular y faborito na Boneiro.
El a bay vota na Tia Sani na Rincon, unda cu un cantidad di simpatisante a bin topa cu ne pa por salud’e prome cu el a drenta paden vota.
Hasta por a nota e dos lidernan di partido, James Kroon y Clark Abraham ta saluda otro na un manera fraternal, demostrando cu a pesar di nan diferencianan di ideologia, nan ta contrincante amical.
Hasta tabatin oportunidad pa prensa local y naturalmente di Aruba por a saca nan potret.
No ta Demokrat t’e meta, Boneiro t’e meta, ta loke cu Abraham a indica.
Abraham: “E pregunta ta, con ta cu Boneiro.” Si mira Boneiro awo compara cu cuater aña pasa, por mira desaroyo. Pero e pregunta ta si e Boneriano a bay dilanti.
Si puntra cualkier Boneriano, nan ta bisa cu no. Tin desaroyo, pero no ta tur ta progreso. Pasobra si no tin pan riba mesa di e Boneriano, si e cas no ta rende, si tin buraco den dak y e cen no ta yega fin di luna, no tin progreso p’e Boneriano.
Partido Demokrat ta un instrumento pa trece sosten y ayudo p’e pueblo Boneriano. P’esey nan a bay eleccion. Nan no t’e meta. E pueblo di Boneiro mester uza Partido Demokrátiko Boneriano pa percura pa buta pan riba mesa di cada hende, percura p’e Boneriano haya su luga, su espacio riba su propio isla.
Ora cu bisa Boneriano: “Nos tur ta migrante na Boneiro. Nos tur a bin Boneiro un tempo. Tin algun a bin varios siglo pasa y tin a bin mas recien. Boneriano no ta nifica di unda b’a bin, sino kico bo curason ta bisa. Cu bo ta parti dje comunidad aki, cu bo kier ta parti di e comunidad aki. Cu bo ta haci bo esfuerso pa ta parti di e comunidad aki. Tur hende cu haci nan esfuerso pa ta parti di e comunidad aki, ta Boneriano,” ta loke Abraham a bisa.
Nan tambe tin derecho y mester haya acceso na tur e bienesnan cu Boneiro ta produci, el a indica. Ta bay eleccion pa percura esunnan cu ta riba Boneiro haya tambe parti di e desaroyo cu tin na Boneiro.
PLAN DI ACCION
Abraham a indica cu a pasa cuater aña largo ta splica, a entrega amienda, a duna presentacion caminda cu a bisa pa manda cen por ehempel pa deporte, hinca cen den cultura y herencia. Percura pa hinca cen p’e parti social. Percura pa tur hende haya ayudo p’un prijs mas pagabel pa nan cas.
Cuater aña largo mayoria a vota contra tur e proposicionnan aki.
Na Boneiro, si mira tur e rapportnan cu tin, ta mustra cu tin cinco area cual t’e gastonan primario di tur cas, cual ta vivienda, transporte, cuminda, utilidad (coriente, awa, internet), pero tambe cuido p’e yiu.
Si por enfoca cu ta baha gasto riba e cinco areanan aki, ta percura pa tin cen den saco di tur ciudadano na Boneiro.
Mester cuminsa duna balor n’e pueblo.
Por sinta papia y discuti cu Hulanda of negosha. Esey ta loke a sosode cuater aña largo. No mester warda riba Hulanda. Pueblo a vota p’e politiconan Boneriano. “Bisti carson y goberna bo isla.” Si Hulanda kier yuda, si Hulanda kier sostene, ta mas cu bonbini. Pueblo tin dolor y ta sangrando y e lidernan Boneriano mester tuma accion y carga nan responsabilidad como mandatario Boneriano.
MANDATO
Clark Abraham a indica cu tin cos cu ta solucion duradero cu lo dura mas tempo. Pero por yega trece alivio rapido. Dentro di 100 dia pueblo mester por sintie caba, den nan saco.
Esey t’e pregunta, den gobernacion cua t’e maneho cu lo hiba mas lihe y rapido.
Mester cuminsa enfoca riba ‘long hanging fruit’ y percura p’e pueblo haya e alivio cu merece. Mester papia cla cu otro. E problemanan cu Boneiro ta den dje no ta cos cu por soluciona di un dia pa otro. Pero e punto ta si cu mester actua. No bin warda cuater aña y den pia di eleccion bisa cu a traha un plan pa posiblemente aki cuater aña bay cuminsa.
Esey no ta partido Demokrat, Abraham a indica.
E pueblo mester di ayudo. No t’ey pa ta brother cu otro. Mester traha y tin ora e solucionnan concreto ta sali haci dolor un rato, pa despues haya alivio.
Mester pone man na obra y percura p’e pueblo haya e alivio cu e merece.
Partido Demokrátiko Boneriano ta kere den e bos di pueblo. Pueblo ta eligi. Demokrat t’ey pa sirbi comunidad. Demokrat ta sinta cu tur partido, pero nan ta goberna y Demokrat ta negosha a base di principio pa sirbi pueblo y no pa sirbi ningun interes di partido, ni interes di ningun sponsor, di nada cu ta aheno cu no t’e interes di Pueblo.
Cu esey posiblemente por tin un complicacion pa cierto partido.
SITUACION DI TURISMO CRUCERO
E punto ta cu tin discusion cu ta exclui un tipo di transporte fo’i otro.
Boneiro no mester desaroya un turismo di masa. Por siña for di e islanan ruman cu a bay fo’i balans.
Na Aruba, tin biaha ta lamenta cu cierto area cu nan a bay mucho leu y ta purba di recupera.
Boneiro tin algo pa proteha ainda. Echo ta cu loke mester tene cuidao cu ne.
Bon gobernacion ta nifica tambe ta imposibel pa crea un desaroyo di sector turistico of producto of parti di economia y ta lanta awe pa mañan y bisa cu lo stop cu esey. Con a para cu e comerciantenan cu a inverti.
No ta bon gobernacion ni ta rasonabel. No ta single out ningun, ni turismo crucero ni di avion.
Loke mester tin ta un balansa caminda cu no tin turista di mas. Si por bisa un hende ta lanta bisa cu mester stop cu crucero, no lo ta di acuerdo cu esey. Crucero tambe tin hende cu ta labora den dje y tin un manera cu por hacie responsabel cu ainda hende por come y toch ta mantene e producto sano. Ta mesun cos cu stay-over. E problema ta aworaki cu e ta fo’i balansa. Ta haya cu mandatario cu ta maneha den panico y grita palabra di stop. No por goberna asina ey, Abraham a indica. No por laga un hende haci inversion pa drenta den un sector pa varios aña largo y un dia pa otro ta bisa cu lo cambia ruta. Mester traha plan di mas aña y hacie den un maneho respetuoso y duradero pa por yega na un balansa, p’asina tur hende haya pan riba nan mesa.
