Chris “Krizs” ta lansa cancion nobo pa Aruba

Khrizs no ta un vocalista desconoci den farandula local, ya caba pa varios aña ta canta y colabora cu diferente banda ultimo añanan aki, e ta forma parti di e front di “Perfect Sound”. Un par di luna pasa e la presenta su idea pa un tema nobo cu e kier a desaroya.

Pa cu esaki e la aserca su amigonan di mas serca Gino Panneflek cu a crea su idea den letra y ademas di esey e hoben talentoso Chris Kross a hinka su parti den djie den e parti musical y a produci esaki tambe.

Despues di a pone tur elemento hunto, mester a ehecuta p’e bira realidad y a busca un grupo di musiconan hoben y talentoso. Den e grupo selecciona pa graba mester menciona entre otro un talent nato manera t’e caso di Denny Loefstop cu a percura pa graba baho, Chris Rudolfo cu a graba e liñanan di percuccion.

Propio Chris Kross a graba e guitar cu ta su specialidad mayor pa lcual e ta studiando den exterior na nivel professional y e liñanan di coro a ser graba pa Rousseau”Rozu” Normil.

Hunto cu e grupo di talent nan aki a graba den e studio di Nigel Maduro cu tambe a mescal y a haci e mastering. “No Namora” ta titulo di e produccion nobo di Krizs, p’e mes ta un placer di por reuni un grupo di amigonan talentoso pa crea loke a cuminza como un idea.