Tur caminda c’un hende pasa rond di nos isla, lo mira un of otro desaroyo tumando luga, sea cu ta un proyecto priva, un proyecto di gobierno of cualkier otro iniciativa, tin desaroyonan positivo tumando luga.
Plan Bo Bario ta den pleno ehecucion caminda tur hende por mira cantidad di cambio cu a tuma luga pa converti barionan rond Aruba, den un ambiente mas agradabel pa biba y comparti cu otro.
Trabounan grandi riba infrastructura cu ta den pleno ehecucion, cu ta percura no solamente pa un miho desaroyo economico, pero tambe pa vivienda y un miho acceso di pueblo na tur loke ta su necesidadnan.
Construccion di edificionan di MFA, ponemento di luznan di caya den diferente bario cu pa añanan largo a conoce scuridad, asfaltando camindanan di santo cu pa hopi aña a percura pa inconveniencia pa esunnan cu ta biba riba un caminda asina y cu awor ta conoce un alivio grandi.
Centro di Oranjestad cu a ser converti den un alohamento pa drogadictonan bou Gobierno di MEP, awe a bira un centro asina atractivo y bunita, faltando ainda varios proyecto pa caba di completa e transformacion completo di nos centro.
Proyectonan den waf di Oranjestad cu ta den ehecucion y cu ya a cambia e cara di entrada pa barconan crucero y pa nos propio hendenan, ta notabel y lo sigui wordo desaroyo den proximo añanan cu ta bin.
Den diferente bario di Aruba por a mira un desaroyo comercial, negoshinan cu a dicidi di establece nan mes pafo di centro di Oranjestad, caminda riba diferente caminda principal, por mira comerciantenan habriendo nan negoshi pa sirbi interes di nos pueblo.
Un cantidad di scol sin igual a wordo renoba y drecha, otro scolnan nobo a bin mientras cu e proyecto di un MAVO-HAVO na Noord ta otro proyecto mas cu lo bay inicia pronto y e cambio drastico aki den enseñansa di nos pais, ta visibel tur caminda.
Scolnan sin cura a haya proteccion awo, tereno di scolnan a wordo asfalta pa asina muchanan por hunga y atende scol den e forma mas miho posibel y esaki ta visibel den tur bario rond Aruba.
E proyecto di expansion di Dr Horacion Oduber Hospital ta otro proyecto grandi cu ta den ehecucion y den su fase final di ehecucion, cu lo percura pa un miho servicio medico pa nos pueblo mientras cu ta trahando duro riba diferente aspecto mas di nos cuido medico pa sirbi comunidad miho.
E proceso di reapartura di e refineria di San Nicolas tambe ta den ehecucion mientras cu ehecucion di e proyecto grandi di Green Corridor ya ta bisto pa tur hende y e impacto cu esaki lo bay tin pa henter nos pueblo, caminda e proyecto di Watty Vos Boulevard, a inicia y ta den ehecucion cu tambe lo bay percura pa miho desaroyonan comercial, di vivienda y social pa nos pueblo.
Mudamento di waf grandi di Oranjestad pa Barcadera tambe a wordo completa y esaki tambe ta percurando pa mas desaroyo comercial den e area di Barcadera y vecindario caminda e interes pa proyectonan den e sector aki, ta bastante, creando tambe mas espacion pa desaroyonan positivo den nos waf Crucero na Oranjestad.
Cifranan positivo di e vision di Gobierno di AVP pa cu desaroyo di turismo di nos isla, ta sigui den su proceso sumamente positivo y apesar di retonan grandi cu a conoce den nos turismo, ATA hunto cu Gobierno ta sigui atende cu e industria importante aki, den e forma mas efectivo cu por tin pa garantisa cu e pilar di nos economia, ta sigui consolida su mes. Por mira cifranan atrobe hopi positivo cu double digits den cresemento pa locual ta e prome quartal di aňa 2017.
Nos pais ta den pleno desaroyo y pueblo por mira tur dia na unda placa di pueblo ta bay, esta bek pa pueblo pa sirbi interes di pueblo caminda pueblo ta consciente di tur loke Gobierno di AVP ta haciendo, esta sirbi interes di pueblo na tur momento, bahando tambe nos desempleo di ariba 12% pa alrededor di 6%.
Ora cu nos tuma nota di e desaroyonan aki, e forma con gobierno di AVP a cambia rumbo di e pais aki despues di e desaster cu partido MEP a laga atras, ta dificil pa pensa cu gobierno di MEP lo por goberna e pais aki bek y destrui tur loke a wordo construi den ultimo ocho aña di gobernacion di AVP.
Mientras cu dirigentenan di MEP ta papia di #sinmiedo, ta papia di un cambio, realmente ningun politico di MEP ainda por splica pueblo ta kico e cambio aki lo ta.
