Diadomingo den careda di 11:00 pm polis a bay den area di Bloemond p’un persona sinta den auto Nissan March. Tabata mustra cu e persona no tabata dunando señal di bida. Aparentemente esunnan den e bario a purba di papia cu e chauffeur, pero e no tabata reaciona y p’esey nan a bati alarma na polis.
Pero prome cu patruya por a yega na e adres den Bloemond, e persona aki a lanta for di un soño profundo y a aleha for dje sitio. Sinembargo, den careda di 11:45 pm e mesun auto aki tabata un tiki mas pariba di e prome adres na Bloemond. Di biaha polis a bay atende cu e persona sinta den e Nissan March aki.
Mirando e estado cu e chauffeur tabata ta aden, polis a dicidi di deten’e. A pidi presencia di transporte policial na e sitio pa asina hib’e pa warda di polis.
