Awe ta Dia Internacional di Bestia y ta un dia pa pone extra atencion na nos mascotanan. A combersa cu veterinario Stephany Wever di Veterinaire Kliniek Wayaca, kende a splica cu Dia di Bestia ta special pa e clinica, pasobra ta un dia cu loke nan ta pasiona riba dje ta bestia cu ta sali na luz.
Aki hende cu tin nan bestia stima ta duna nan extra treat, of djis paga mas atencion na nan. Loke por a mira durante e pandemia ta cu hopi mas hende tabata na cas y tabatin mas tempo pa adopta puppies of pushi.
Aworaki mayoria hende ta bay traha bek y ta dificil pa tin e balansa bek ora cu tuma bestia na cas.
Pa tin un bestia ta un responsabilidad grandi y ta algo cu e veterinario kier a conscientisa pueblo di Aruba. Ora cu adopta un cacho of pushi, ta un responsabilidad grandi cu ta tuma den e famia. E ta un miembro di famia cu mester di atencion, cuido y amor. Esaki ta bin cu tempo y placa, manera cuido veterinario, cuminda special. E no ta mesun simpel cu hende ta pensa.
Segun Wever tin hende cu ta doño responsabel y ta realisa cu tur cos cu haci na e clinica ta pa yuda nan bestia. Pero desafortunadamente no tin e consciencia suficiente di tur hende pa vacuna, sterilisa, etc. Tin cierto malesa cu ta endemico na Aruba cu no ta na otro pais, pasobra no ta haci un regimen di vacunacion suficiente cu cacho y tin demasiado populacion di bestia riba otro cu ta haci cu e malesanan aki ta sigui.
Manera bichi di curason, parvo virus, carpata y malesa di carpata.
E mensahe cu veterinario Wever tin ta uno simpel: “Sea responsabel, stima bo bestianan. E ta mas cu djis duna nan cuminda. Nan mester atencion, nan mester cana, nan mester desaroyo tambe y spaar.”
Pa cobertura mas amplio lesa edicion di TREMPAN.
