Den oranan di Diasabra merdia Polis a bay pa e crusada di Weng Kee na Santa Cruz pa un accidente.
Aki chauffeur di un Nissan tabata bini di Santa Cruz bayendo pabou ora un Hyundai Getz a subi su dilanti sin dune preferencia. Aunke el a lastra un brake, e no por a evita y e impacto a causa cu tur dos auto a keda sin por a sigui core.
E chauffeur di e Nissan a splica cu duele den su voz cu el a caba di cumpra e auto pa un bon prijs y bon teni pa su doño anterior den siman cu a pasa. Y ya awo a haya su mes cu un auto cu no por core mas pa via di un accidente di falta di duna preferencia.
E chauffeur di e Hyundai Getz a laga sa cu e no a wak niun auto ta bin y p’esey el a subi caminda. Afortunadamento niun hende no a sali herida, pero sim ester a yama Takelwagen pa tur dos auto, pasobra nan no tabata apto pa core mas.
Mester wak cu seguro awo, paso e doño di e auto “nobo” no a ni haya chens di pasa e seguro over pa su auto recien cumpra. A menos cu e haya un auto nobo regalo pa Dia di Tata mayan, e lo pasa Dia di Tata sin auto.
