Compila pa sr. Edwin Thijsen (cooperador pastoral di Parokia Santa Anna) A duna un breve splicacion di e imagen di Sta Anna cu den su scochi e tin mama Maria y na su turno Mama Maria den su scochi tin Hesus na diferente parti di Europa. Un imagen cu ta representa tres generacion. Cual ta nifica cu e siguiente generacion ta depende di e grandinan.
E balor di bida tin cu keda wordo pasa di yiu pa nieto. Lamentablemente esaki a para un caminda na Hulanda p.e. cu e generacion bieuw no a pasa e balornan na e generacion nobo. E consecuencia ta generacionnan sin balor y nos ta mira e resultado. Pastor a mustra riba e
peliger cu tin si kibra e pasamento di e balornan aki. Tambe pastor SZPILA a bin cu un relato di Santa Catalina di Siena, caminda esaki a wak un imagen di un wela cu mama y nieto, den fierno. Cual ta nifica cu e wela/o no a pasa nada di balor na e mama y esaki tampoco no por a pasa balor na su jiu, concecuensia: cu tur generacion e termina den fierno. Aruba.
Ainda nos ta mira ruinanan di casnan antaño cu mosaiconan religioso decaí aki y aya na Aruba, caminda bo por imaginabo e casnan humilde yen di famianan cu fe kendenan ta sembra pa nan cosecha. E cunuco ta yen di matanan na abundancia y tur hende pa poco cu nan tin tabata feliz. E balornan tabata ser pasa di welo/a pa mama pe yiunan. Awor solamente a keda e ruina pa nos mira y cu ta laga nos anhela na e epoca di balornan den famianan. Nos casnan a para bira casnan bashi den cual nos no ta sembra mas y cual cunuco a yena cu mata shimaron.
Cunuconan yen di matanan shimaron ta laga nos anhela na e epoca di abundancia. Abuelo/anan no keda pega dilanti boso television y otro cosnan cu no tin balor. No bisa cu nos yiunan a faya. Hubentud no a faya. Si bo sembra bo ta cosecha. Ma si bo keda claba dilanti bo television, bo no ta tuma tempo ni pa bay misa diadomingo mas pa resa pa famianan. Con bo kier pa e hubentud haya e balornan pa nan madura y por comprometi nan mes? No solamente bin misa diadomingo, ma tambe tur dia den siman. Nos ta den necesidad di e oracionnan aki di nos abuelo/anan pa nos casnan keda sembra na bundansia di balornan. Ami ta kere cu si no tin hobennan den misa ta nos grandinan a faya den pasa e balornan pa e yiunan. E la pidi e abuelo/anan pa hasi mas, pa bin misa tur dia, pa resa y keda resa, paso Aruba ta den nesesidad di e oracionnan aki. Paso ta e grandinan tin cu hasi e diferencia pa e generacionnan binidero hereda e cunuco na abundancia. Abundancia di balornan. Balornan cu ta trese birtudnan, pa yiunan madura den iglesia y no den cunuco di matanan shimaron. Pastor a duna varios nombernan di abuela/onan y mamanan santo cu a sembra yiunan santo. Manera; Santa Monica y su yiu San Augustin. Mama di Santa Clara y Santa Clara y su ruman muher, Mama di San Don Bosco y Don Bosco mes. Tata y Mama di Santa Teresita.
Doctora di Iglesia, asina por menciona mas famianan santo cu raisnan familiar, manera e imagen di Santa Anna, Mama Maria y Hesus. SABIDURIA 3:9 Pastor a pone enfasis riba esnan cu ta fiel, lo bo ta liga na Señor, lo bo comprende e berdad. Si bo ta fiel lo bo ta liga na Señor den amor; paso gracia y bondad ta pa su escohidonan. Pastor a mustra con Hesus ta papia duro cu nos den versiculo 11; Infelis ta esnan cu ta despresia sabiduria y instruccionnan; nan speranza ta enbano, nan esfuerso inutil y nan obranan ta sin balor. Versiculo 12: Nan esposanan no ta sirbi, nan yiunan ta degenera, nan desendensia maldiciona. Un advertencia; un profecia pa nos tene cuidao kico nos ta hasiendo. Pa para un rato keto y refleha como abuelo/anan pa ban cuminsa di nobo na sembra cunuco pa duna bon fruta, si no maldicion ta warda nos. Un profecia duro pa nos cu ta grandi cu tin un carga pa cumpli cu ne, cu ta pasa e balornan pa e proximo generacionnan. Keda sin cumpli tin su consecuensia sin duda. Pastor a sacudi e pueblo santo di Dios ayera cu hopi amor y respet pa loke ta trata e Palabra di Dios cu tin cu keda pasa di generacion pa generacion. Nos no por falta cu esaki hamas.
Pensionado-/grandi- /ancianonan laga Spirito Santo renova nos mentalidad. Dios ta revela na
esnan cu curason senciyo. Laga nos habri nos curason, nos mente, nos wowo y oido, pa Dios dispone di nan y inspira nos. Laga nos no tene miedo. Nos tin cu cana den LUZ di sinceridad, aleha di hypocresia cu ta hasi daño na nos Salbador. Nos tin e necesidad di Spirito Santo pa yuda nos ser transparente y asina Dios pa medio di nos revela Su mes na otronan tur dia. Aruba ta den e necesidad urgente pa e generacionnan keda forma den misa pa asina nan madura cu e Palabra di Dios y comprometi nan mes. Pensionadonan/grandinan/ancianonan, ta carga culpa, cu iglesia ta bashi. Nan tin tur tempo di mundo pa bai misa pa resa. Ki ora cu ta. Asina nan ta duna ehempel na nan yiu- y nietonan. Unda nan a keda? Pastor a manda un advertencia serio den direccion di pensionadonan cu ta claba dilanti television. No dilanti television, ma cu obranan di tur dia den misa pa resa como un bon cristian. No solamente diadomingo ma den siman tambe.Cu esaki nos ta keda fiel na sabiduria di Dios. Stop di busca excusanan y man na obra. Hopi a keda comenta e predicashi aki cu a keda sembra den cada un di nos presente te den profundo di nos ser pa un pastor Santo di nos tempo. E predikashi a keda zona te ora e ultimo fielnan a jama ayo 10. 30 pm, cual onda lo keda zona te den ultimo skina y sin frontera.
