Diasabra anochi algo pasa di 10:00 pm a sosode un accidente di auto net na e rotonde di Tarabana, na Dakota. Un auto marca Nissan modelo pickup color berde schr a dal den un otro auto tambe di marca Nissan.
Pero na e sitio polis a constata mesora cu chauffeur di e pickup tabata burachi, pa cual a deten’e mesora na e sitio. A bis’e su derecho y a splic’e e procedimiento penal cu ta encaminda cu ne, door di transport’e pa ward’i polis y present’e na un subfiscal.
Den caso asina, si e chauffeur ta patapata cu e no sa su adres, ta cer’e te mainta ora su wayaba pasa. Si e no ta tanto burachi, sa lag’e yama un amigo of famia pa busc’e, basta e cumpli cu un “rijverbod” di por lo menos ocho ora.
Asina mes, un sospechoso cu causa accidente burachi lo mester presenta dilanti hues, cu chens pa haya castigo di trabou pa comunidad, multa of hasta por perde su rijbewijs pa un tempo of hasta pa semper! Tur cos ta depende cuanto alcohol nan descubri den rosea di e sospechoso. E limite ta te cu 220 ugl, pero sa topa cu hende cu ta hasta cuater biaha mas halto, cu ta hinca nan den problema serio cu husticia.
