Un rato pasa, riba e vuelo di Avianca for di Bogota, Colombia, a yega casa di un coordinador di minister. E señora, di origen Colombiana, no a aprecia na momento cu duana a pidie pa habri maleta y a hacie algun pregunta standard, manera por ehempel si e tin algo pa declara. E señora no a aprecia cu e mester pasa door di control y a menasa tur e duaneronan cu e lo yama Rocco Tjon pasobra su casa ta coordinador di minister. E pasahero ni ta compronde cu duana no ta resorta bou di minister di husticia, sino minister di finansa. Mas el a rabia ora a hay’e cu remedi ilegal cu e kier a importa den forma clandestino na nos isla.
E situacion a medio bay fo’i man paden, te cu e duaneronan a opta pa yama polis, pa bin reenforsa nan un rato. Polis a splica e señora cu e no por menasa un ambtenaar den ehecucion di su funcion, pasobra esey ta un delito castigabel pa ley. E señora a keda puntra e duanero y polisnan pa nan nomber pasobra cu e lo raporta tur na Minister Rocco Tjon. Tambe el a saca su celular pa haci un video call y a pone su casa, esta e coordinador di minister pa e mira con e ta atendiendo cu e duaneronan na aeropuerto. A splica e pasahero cu no por uza celular den e area aki pasobra e ta un area restringi pa uzo di celular.
Pero na final a descubri dicon tanto rabiamento y menasa contra autoridad na frontera. Ora cu porfin e señora a calma y a habri su maleta cu el a trece cu ne for di Colombia, a bin descubri cu el a trece un cantidad di remedi, sea ta pa su mes, sea ta pa hende of sea ta pa bende, pero sin cu e tin un permiso di importado di remedi for di Colombia. E duanero a splic’e cu pa por importa remedi di otro pais ta rekeri un permiso of mester bay busca un stempel di Inspectie voor Geneesmiddelen na IVA. Como tal, a tuma tur su remedinan den beslag, te ora cu e por mustra un permiso legal pa por importa nan.
Claro cu e casa no a keda mucho contento y pafo a reclama e duanero dicon el a “haci fastioso” cu su señora. E duanero a splic’e cu si e tin algo di reclama, pa e pasa paden y asina por cuestiona su hefe, den caso cu e no ta contento cu duana ta controla maleta. E casa, obviamente cu si conoce leynan local, a opta pa no bin paden. Asina mes, e duaneronan a traha un declaracion di e susedido pa nan manda pa nan hefe, pasobra casa di coordinador di minister a menasa nan tur cu lo keha tur na minister Rocco Tjon pasobra no ta sistema di controla maleta di pasahero. E señora a bisa tambe cu minister a bis’e cu duana no tin autoridad pa controla remedi na frontera, locual tampoco no ta cuadra cu berdad.
