Awe mainta Corte den Prome Instancia a sentencia Calvin Kelkboom na dies aña di prizon. Ministerio Publico a acus’e di intento di asesinato y posesion di arma di candela.
Den e caso aki tabatin dos acusado, y e otro tabata Albert Geerman, kende a scucha su sentencia siman pasa diaranson caba. Den su caso e tabata na e sitio, pero e victima Brandon Wouters y Ashton Mentore niun momento a declara di a mira Geerman cu un arma di candela.
Ademas di e acusacion di intento di asesinato cu a tuma luga riba 29 di juli, 2019, a acusa Geerman tambe di posesion di arma di candela, y menasa Polis y personal di Servicio di Ambulance.
Debi cu no tin prueba cu e tabatin un arma e anochi ey den su man y a los tiro, a declar’e liber di e acusacion ey. Y e dianan cu el a sinta, cu tabata 245, tabata pa e menasa contra Polis y Paramediconan. Mientrastanto e ta riba caya caba.
Otro ta e caso contra Kelkboom kende, apesar cu e ta nenga, Polisnan a reconoce riba camanan di siguridad. E hecho a tuma luga banda di e veld di basketball den Village y un di e balanan a gara Brandon Wouters den su lomba. Apesar di tur esfuersonan di specialista, no por a haci nada pa recuperacion di e victima y el a keda invalido.
Den e caso di Kelkboom e dos victimanan a reconoce como esun cu tabatin arma di candela den su man y a wak’e tira. Aunke e ta nenga di ta pariba, e otro acusado si a admiti cu nan tabata na San Nicolas. Hues no ta kere e acusado ora cu e ta bisa cu e no tabata pariba. A tene cuenta cu no ta prome biaha e ta haya un condena pa delito cu arma. P’esey a haya e demanda di fiscal, di 10 aña na su luga.
E acusado tin dos siman di tempo si e kier apela e decision.
