Marduga e boto tipo Peñero cu dos motor a drenta na un boca na e parti Noord di Aruba. Esaki ta e area considera blank spot cu radar no ta capta. E ta un boto cu a bin di Venezuela. Den pasado e area aki ta uno usa pa drenta cu droga.
Ultimo tempo el a bira tambe pa drenta cu ilegal. E ora exacto cu el a drenta no ta conoci. Ta diadomingo mainta pasa di 6or cu un piscador a bay tira liña na baranca y topa cu e situacion. Mesora el a yama Polis. Polisnan a busca pero no a yega na e boto. Prensa a yuda pa asina Polis haya e sitio exacto.
Boto Peñero “No Tiene Limite” a drenta cu ilegal y Dios sa kico mas
https://24ora.tv/31hyp2aPosted by 24ora on Sunday, June 9, 2019
E boto a subi tera y a keda atras. Tin dos motor pega na e boto. No a topa ningun hende na e boto y tampoco cosnan ilegal abordo. Probablemente e cosnan a somenta for di momento cu e boto a yega tera. E sitio exacto ta na e boca pariba di Boca Mahos. Algun 100 meter pabou di Natural Bridge.
Helicopter no tabata den aire tampoco pa yuda mesora den un buskeda. Minister su urgencia pa helicopter tabata basa riba problema di ilegalnan for di pazuid cu tabata yega Aruba. Den pasado boto a drenta mas pariba na Dos Playa y otro bocanan mas pabou di Dos Playa.
Tin hende a muri e tempo ey y a confisca arma y droga. Despues tambe otro a drenta cu ilegalnan marduga y den dia te cu atardi a haya algun ilegal canando hopi leu te den Alto Vista cu hand granaat. Esakinan ta casonan fresco den nos memoria. Probablemente bisiñanan lo sigui informa si nan mira movecion di hende durante dia.
