Diadomingo anochi a tuma luga un incidente caminda cu segun palabra di bisiñanan na De Vuyst, polis a haci abuso di nan poder. Amelie Alijn, un habitante di e bario, tabata para na su cura, polis a bin na un manera hopi bruto riba dje, te cu nan a haci’e dolor. El a conta cu e tabata drentando su cura, nan a bin, ni bisa bon nochi y pa e drenta den auto cu nan.
Despues e polisnan a cuminsa chok’e, want’e, puntre kico e ta haci na banda di e cura. Alijn a menciona cu e tabata tin dolor di cabes. Respuesta di e polisnan ta cu e no mag di ta pafo. Yiunan di e habitante tabata puntra ta kico tabata pasando. Mientras tanto e agentenan tabata haci e habitante dolor. El a purba di hala nan, indicando cu e ta hayando dolor y e falta di rosea. E mes no ta compronde dicon polis a tuma e accion aki y a cuestiona nan kico e lo ta haciendo.
E yiunan di Alijn a reacciona riba e forma con e polisnan tabata atende cu nan mama. Polisnan a bula cura y bay cu e yiunan y te ainda no a trece nan y tampoco a bisa Alijn kico ta bay pasa tampoco (te na momento cu e tabata duna un declaracion den oranan di mainta).
Alijn a yama warda den oranan di marduga y nan a avis’e cu nan tin cu keda. Ta trata aki di tres menor, 16, 14 y 12 aña y tin nan cera separa.
Ta algo cu sigur no ta husto pa haci cu un ciudadano. Mientras tanto nan a aresta Alijn, pero el a sa di keda den libertad. Sin embargo nan a boei’e y lague marca. Pa loke ta su yiunan, nan a maltrata nan tambe, benta nan riba vloer. Na warda nan no kier a duna nomber di e agentenan cu a haci e abuso aki. Un di e agentenan su fam ta Hunt, kende a trata e famia aki masha malo mes. Hopi bruto mes, segun Alijn. Segun Alijn ta menciona cu e polis a indica cu ta e muchanan a tira piedra y dal patras di e auto di polis. Alijn mes ta bisa cu esaki ta imposibel pasobra caminda e cas ta situa, e no ta logico. Con e muchanan por a tira piedra di patras y e agentenan no a uza nan cabes.
Un otro habitante di de Vuyst tambe a pasa un mal rato cu polis. Shariska Alberts a menciona cu diadomingo anochi el a hay’e den un situacion cu polis a yega pa atende cu un caso p’afo riba caminda y nan a drenta den su cura, sak’e y su yiu homber na un mal manera.
E ta un disgusto, segun Alberts. E manera tambe cu a atende cu e bisiña, ya menciona anterior, ta uno masha bruto mes. Den su caso, para como un miron, para den su cura di cas riba un stupi, polis a drenta su cura di cas, lastra su yiu prome y Alberts despues, lag’e casi sunu. No ta algo bunita pa atende cu hende asina.
Polis a indica nan na momento cu nan a yega na cura di cas di Alberts, pa e bay paden. Unabes cu nan a bira lomba pa bay paden, polis a drenta y a bay cune y su yiu. E trato tabata bruto. Nan no a ni haya chens pa sa pakico nan a wordo deteni, siendo cu nan tabata den cura di e cas. Nan no tabata di acuerdo cu e situacion bisando den un grabacion cu nan no tabata di acuerdo cu e trato di e personanan envolvi den e incidente ya menciona.
Cerca fiscal, a scucha nan version y despues a laga nan bay. Asina mes Alberts y su yiu a haya cada un multa di mil florin.
Ora cu a trece nan bek, a baha nan na skina y nan mester a cana bay bek cas. E no ta compronde e trato duna.
Polis a faya, segun un otro yiu di Alberts, kende tambe tabata testigo di loke a pasa cu su mama y su ruman homber.
E ta conta cu e bisiña a bay sali pa busca un pildo cerca un otro bisiña mirando cu e tabata tin dolor di cabes durante Toque de Queda. El a sigui conta cu e bisiñanan tabata wordo mal trata. E resto di bisiñanan a protesta naturalmente.
El a conta cu hopi palabra malo a cay anto contra muchanan menor di edad, na momento cu a bay cu nan.
Mirando e accion straño aki, el a saca su cel y cuminsa graba y tambe a wordo stroba. E habitantenan tabata implora e polisnan pa no haci e abuso cu e mama y su tres yiunan. Na e momento eynan, polis a bisa cu nan a tende piedra, cual e hoben den su version a bisa cu den ningun momento no tabata tin ni zonido ni bisa nada di piedra.
Loke si el a logra scucha con un di e agentenan ta meld cu tabata tin awacero di baranca. Confirmando loke su mama a bisa, e hoben a comenta riba e abuso y ta inaceptabel loke a sosode. E hoben a indica cu e polisnan a drenta den su cura haciendo tipo di accionnan asina.
Den su declaracion e hoben tabata indica cu e polisnan no tabata tin ningun proteccion ni pa nan, ni pa e habitantenan. Esaki no ta Toque de Queda, sino Purge caminda cu nan por haci y deshaci. E polisnan no a haci nan trabao, segun e hoben. Polisnan a faya aki con nan a handle a situacion. Muchanan a saca for di cas, drenta hende su cura, papia malo riba dje. Kico ta pasando, segun e hoben. Finalmente e kier sa di prome minister y gobierno kico ta pasando. Si esaki ta un Toque de Queda, no sa unda Aruba ta bezig ta bay. Na otro pais, polis no ta drenta bo cura of drenta bo cas y sacabo bay cu bo sin nada.
