Pa un “Voicenote” a kita Andrew Hoo for di su funcion

Minister Andin Bikker un rato pasa a comunica cu el a kita Andrew Hoo for di e funcion di Altocomisario di Cuerpo Policial Aruba. E lo bay encarga cu un otro funcion den Gobierno. Ki funcion, e Minister no a menciona ainda. Si el a bisa mesora cu Vanessa Tjon-Kock, casa di Parlamentario Rocco Tjon awor lo bira Alto Comisario suplente! De facto, e tabata un di e mihonan den e procedura di seleccion, pero Minister Bikker a dicidi otro e tempo aya.

Minister Bikker a informa cu Gobierno a dicidi cu ta bay encarga Alto Comisario Andrew Hoo cu un otro funcion y tarea den Gobierno y cu Hoo a mustra comprencion pa e decision tuma. Minister di Husticia, mr. Andin Bikker, den nomber di Gobierno a gradici Andrew Hoo pa su terea desplega durante 2 aña di su encargo cu e funcion di Altocomisario.

Asina e ekipo di PR di Minister Andin Bikker a sali ataca Andrew Hoo asina cu a bira conoci cu e no ta den funcion mas di Altocomisario di Polis di Aruba.

E realidad sinembargo ta, cu Andrew Hoo, a manda un “voicenote” pa un miembro di prensa debi cu for di seno di Gobierno a culp’e cu e tabata esun contra pa prensa haya acceso durante e “Toque de Queda”. El a splica den e mensahe via whatsapp cu esey no tabata e caso cu lo contrario, e tabata un di e dos miembronan di “kluster” cu tabata na fabor pa respeta libertad di prensa. Na final di e mensahe el a pidi e periodista pa manda e voicenote aki pa su coleganan tambe. E Minister no a keda contento cu esey y mesora a probecha pa nombra casa di lider di Fraccion di MEP den e funcion di Altocomisario y priminti Hoo un otro funcion.

Minister Andin Bikker no ta e mandatario cu mas exito den su maneho di Recursonan Humano. El a purba kita director di DIMAS, pero no a logra. El a purba cu Migracion, cu Gerald Vingal, pero no a logra y ainda e ta cobrando sin por funciona den su funcion. El a purba cu Icho Matos, mande cas y awe Matos ta bek na trabou. El a bay purba e mesun hazaña cu Elio Blijden, pero tambe a gana su caso y ta cobrando na cas. Asina por repasa un lista largo di hefenan di departamento cu Bikker a purba kita den un esfuerso di “Bula nan cabes” sin cu el a logra na final.

Asina e ekipo di PR di Minister Andin Bikker a sali ataca Andrew Hoo asina cu a bira conoci cu e no ta den funcion mas di Altocomisario di Polis di Aruba.

Cu Andrew Hoo lo keda cu su mannan crusa no ta conoci. Teniendo cuenta cu el a bay laga un bon funcion atras na Marriott Resort, no tin duda cu e lo bay guera cu e mandatario, no solamente pa su salario pero mas ainda pa su integridad y bon nomber. No por ta asina cu Minister ta “hire and fire” Hefenan di departamento asina sin mas, sin cana e procedura corecto pa duna tur partido oportunidad pa defende nan mes.