Minister di Salud Publico, Cuido di Nos Grandinan y Deporte, Dr. Carlos “Alex” Schwengle hunto cu president di Fundacion Lotto pa Deporte, Di-Stefano Wernet a bishita diferente facilidad deportivo.
E dia a cuminsa cu un bishita na e club di dam, unda cu Fundacion Lotto pa Deporte e entrega 7 holoshi specialmente diseña pa uza durante di competencia y tambe a haci entrega di un check pa e organisacion por cumpra un cashi na Van Dorp pa warda nan
material cu ta uza pa competencia. Na Compleho Deportivo Frans Figaroa, Minister Schwengle y presidente di Lotto sr. Di-Stefano Wernet a mira kico tur ainda falta pa keda renoba. A ricibi 4 palo di luz nobo y lo cambia e seisnan bieu, cual ta luznan cu lo brinda suficiente claridad y lo baha e costo di electricidad. Tambe a mira cu lo mester verf e
edificio y cambia e yerba di veld. A haci un inspeccion na stadion di Nadi Croes/Crismo Angela, unda cu Minister Schwengle a mira con ta bayendo cu e trabounan. Na e momentonan aki ta drechando e tribuna pa asina publico por sinta comodo ora cu nan ta mira un wega. E inspeccionnan di veld no a stop eynan y e siguiente caminda tabata e canchanan di baseball na Pos Chikito.
E dos veldnan aki mester di cierto renobacion y trabou adicional pa nan por wordo bon uza. Banda di verf y drecha e daknan di tribuna mester mehora e condicion di e veld nan tambe. Tin plannan pa haci Joe Laveist Sport Park un centro deportivo multi funcional, unda cu no ta baseball so lo hunga eyden pero tambe basketball y volleyball. Lo bay bin un ‘indoor complex’ cu airco pa asina por haci uzo di esaki pa cualkier deporte, sino embargo esaki lo mester bay den diferente fase. Pero traboouan ta andando caba y wak e progreso di esaki tambe. A bishita IBiSA pa asina mira kico tur falta pa renoba. A verf e parti pafo di e edificio, pero lo drecha e parti paden. Ta remercabel cuanto hende ta
haci uzo di e facilidad aki sigur IBiSA pariba ta funciona como un Centro di bario ya cu ciudadanonan di tur edad ta bishita e centro y actualmente e ta e cede pa diferente tipo di deporte. Na IBiSA tambe lo drecha cosnan chikito cu falta esaki ta encera na duna parti paden un facelift. Minister Schwengle tabata hopi contento di mira e proceso y e progreso di e trabounan di renobacion.
