Juraima Wouters: Bisa mi mama y mi tata mi stima nan hopi

Esaki tabata e ultimo palabranan expresa door di Juraima Wouters, na caminda pa hospital hunto cu un amigo. Na yegada el a fayece.
Juraima Wouters ta victima di violencia domestico, pelea continuo entre e y su pareha Alexander Yeremy Ras di 22 aña, cu a culmina dia 7 di november ora cu Ras a propin’e un hinca mortal.

ADV

E dia en cuestion e Wouters y Ras tabata bayendo cas di ex di Juraima Wouters, pa busca su paspoort, ora cu den auto a surgi un discusion pisa. Un amigo cu tabata den e vehiculo a trata di hala nan for di otro, pero tabata parce cu niun ta ria pa otro. Ras a baha pa cana bay y Wouters a bay su tras pa dal’e. “Ami no ta permiti ningun hende maltratami. Si e dal mi, mi ta dal’e bek,” Ras a bisa den un di su declaracionnan.
EL a bisa tambe cu e dia ey, el a mira Wouters ta bini riba dje cu un schroefdraaier, pa cual ora cu el a tende ta grite, el a bira, saca e cuchiu y a propina Wouters un hinca den su pecho banda robez. Tanto e amigo como e acusado a declara cu nan a mira cu Wouters a cuminsa sangra profusamente. Mientras Ras a bira lomba y gana bay, “pasobra mi a spanta”, e amigo a carga Juraima hink’e den auto y a coy direccion di hospital. E amigo a keda pidie pa wanta duro pero e tabatin hopi problema pa hala rosea. Solamente el a logra expresa: “Bisa mi mama y tata mi stima nan hopi”.

Na hospital a keda constata cu el a perde hopi sanger y paden tambe e tabatin sangramento a causa di e hinca. Patalogo a constata cu e hinca tabata 11 centimeter profundo den su curazon parti ariba.
Un di e problemanan mas grandi di e pareha tabata e uzo di droga. Mas den e caso di Ras, kende ta bisa cu si e no uza marihuana e ta bira hopi agresivo. Ademas e ta scucha stemnan ta papia cun’e, e ta schizofrenico, ta sufri di depresion y a pasa un experencia traumatico ora cu e tabatin 7 aña. El a descubri un omo cu a pone un fin na su bida y e no por a haci nada pa yud’e. For di e tempo ey e no a keda bon.
Durante tratamento di e caso mes practicamente e no a papia, a keda cara’bou y simplemente a acepta tur loke cu a pasa.

Mayornan di e victima tambe tabata presente y principalmente pa e mama e tabata hopi doloroso pa scucha con tur cos a sosode y e ultimo palabranan expresa pa su yiu.
Fiscal ta haya cu e acusado a baha for di auto caba y mester a sigui su caminda pa evita problema. Pero tambe el a cuestiona e hecho cu e ta cana cu un cuchiu. “Hasta ora cu bo pareha a bini riba bo, bo por a push’e. Pero bo a dicidi di hink’e.” Fiscal por ultimo a bisa e acusado cu e stemnan cu e ta scucha no a hunga ningun rol na momento cu el a comete e delito. P’esey tambe profesionalnan cu a analis’e a bisa cu e ta responsabel pa su actonan. Teniendo cuenta cu tur aspecto, inclusive su situacion, a pidi un castigo di 10 aña.
Yeremy Ras no tabata interesa pa haci uzo di su ultimo palabra. Dia 5 di juli pa 8.15 tin sentencia den e caso aki tambe.

Comments

comments