Ryson Paskel: Miho 10 aña dilanti Hues cu 10 pia bou tera

Ryson Paskel ta arepenti of no di loke el a haci? Esaki ta loke Fiscal tabata kier sa. Den Corte e tabata sinta trankil y for di KIA el a publica un mensahe riba su Instagram cu ta mustra masha poco seriedad.
Diabierna mainta sala tabata yen di famia y amigo di e victima Camilo Sosa, kende despues di discusion cu Paskel, a haya dos hinca di 15 centimeter profundo cu a kita su bida.

ADV

HISTORIA
Un luna prome e auto di Camilo Sosa a daña y el a stacion’e dilanti cas di Paskel. Pero segun e acusado, e bisiñanan a reclama, y el a move e auto na otro banda di caminda.
Algun dia despues, Paskel a mira cu e auto a disparce y no tabata sa si ta Sosa a bay cun’e of otro hende.

DISCUCCION
Dia 2 di september, 2018, Camilo Sosa tabata riba parkeerplaats patras di Sandbar hunto cu tres amigo. Ora cu Paskel a pasa banda di dje, mesora el a reconoc’e como esun cu a horta su auto y a bay reclam’e. “Abo a horta mi auto,” asina e pelea a cuminsa tambe. Camilo a dal’e un mokete y  nan a sigui bringa. Tur declaracion riba esaki ta cuadra cu otro. Dado momento Paskel a keda cu su t-shirt completamente kibra y a kita esaki. E grupo a keda cana manera den un circulo, te ora cu Paskel a dicidi di subi su auto pa bay.
Segun e acusado a declara, ora cu el a haya e sla for di Camilo, su bista a bira preto y el a haya un rabia grandi. El a subi su auto pa bay pero a bolbe 5 minuut despues y a mira su agresor riba e Parkinglot di Arawak. Riba e filmacionnan confisca, por mira con e ta baha na careda cu su man tras di lomba. Ora cu e yega cerca, Camilo ta haci intento pa wanta, pero ya caba el a propine e hinca y a huy for di e sitio.
No a logra haya e arma, pero sa cu e ta un cuchiu skerpi di ambos banda y mester ta por lo  menos 15 centimeter (mita linial). El a perfor’e na su curazon banda robez ariba y su pulmon banda robez. Cu e dos perforacionnan aki, no por a haci nada pa salbe, segun rapport di Patologo.

FUGITIVO
Kico exactamente el a haci despues, niun hende sa pasobra el a disparce, supuestamente den mondi.
Durante dos luna largo autoridadnan a tira diferente inval y finalmente Team di Aresto a bin detene dia 29 di october na cas di un familiar na Santa Cruz. Pero hasta durante di su detencion aki el a trata di huy, sin resultado.
A puntr’e den Corte tambe pakico el a huy. Segun su contesta, e tabatin mester di tempo pa busca un Abogado. Pero tambe e sa cu e mester bay cera, pero e no tabata por a “deal” cu esaki y kier a prepara su mes mentalmente pa esey.
A mustr’e cu su acto a causa un dolor grandi pa famia Sosa. E victima a caba di bira tata y e famia a perde un yiu y amigo cu tabata hopi stima. E recuerdo aki a causa cu tanto mama como tata di e victima no por a wanta nan lagrimanan.

PROBLEMATICO
A repasa bida tambe di e acusado, kende no tabata tin’e facil, pero Fiscal a bisa tambe cu esey no ta motibo pa kita bida di hende.
Su mama fayece ora cu e tabatin 14 aña y hunto cu su ruman homber chikito a bay biba cerca nan wela. Cu su tata e no tabatin un bon relacion, aunke awor e ta miho y el a cay manera den un bashi.
Pero apesar di su traumanan, Psychologo, Psychiatra y Reclassering ta haya cu e ta responsabel pa su actonan.

FISCAL
Fiscal a cuestiona cu e acusado no ta mustra duel’e di loke el a haci. E ta sinta trankil di dje y no ta mustra emocion. “Boso por mira mi cara trankil pero paden mi tin hopi problema cu mi mes y cu loke cu a pasa,” el a contesta.
Mesora Fiscal a saca un potret pa mustra cu, for di den KIA, el a publica riba Instagram cu e siguiente mensahe: “Miho 10 aña dilanti Hues cu 10 pia bou tera”. Mesora el a dal cera y no kier comenta mas riba e asunto.
Fiscal a cuminsa pa splica e motibo pakico no ta proba asesinato premedita (Moord). Pa esaki e mester a tuma un decision pa comete un delito, cierto tempo a pasa cu e por a pensa riba dje, y con tur e ta bay hacie. Den e caso aki tur cos a sosode den 6 minuut di tempo.
Pero si Fiscal ta haya proba cu el a actua intencionalmente (met opzet) y pa esaki e mester wordo castiga. No por papia di defensa propio tampoco. Esey por tabata e caso, si el a comete e delito na momento cu e tabata enfrentando Camilo y su tres amigonan. El a subi su auto pero no a bay cas. El a bay draai un rond y a bolbe cu e intencion pa hinca Camilo, pasobra el a baha cu e obheto skerpi den su man y a bisa Camilo “Bo a h…. cu mi awo”. Pa mesora despues hinke.
Pa tur esaki mester pidi un castigo, “pero mi mester tene cuenta cu bo circumstancianan tambe,” e Fiscal a expresa. “Bo a pasa den hopi violencia na cas prome cu bo mama a fayece. Mi tin comprension pa esaki, pero e no ta hustifica e acto cu bo a comete,” el a bisa e acusado.  Y a sigui bisa: “Bo ta jong y bo ta un first-offender. Pero bo mester corda si cu  “If you don’t want to do the time, don’t do the crime. Mi a pensa hopi ki castigo mi pidi. Mi ta kere cu un castigo di 12 aña ta na su luga.”
E acusado na final a bisa cu e sa cu nada cu e bisa ta kita e dolor cu el a causa, pero e kier a disculpa su mes na e famia.
Dia 5 di junli awo pa 8.15 di mainta tin sentencia.

Comments

comments