Blunder di Trudy Hassel a pone cara di husticia na berguensa

Tabatin hopi pregunta ayera, con Minsterio Publico por a hinca un accion asina relampago den otro buscando droga y arma na Olde Molen Nightclub. Vocero di Polis a confirma cu ta un ordo a bin di Ministerio Publico y Polisnan mester a simplemente cumpli. Pero awe mainta a sali afo cu e ordo a bin despues di un Proces-Verbaal traha dor di ex Comisario Trudy Hassell den cual e ta sigura cu posiblemente tin droga y arma den e establecimiento. Awor cu no a haya nada, cara di henter e aparato hudicial di nos pais a keda na berguensa.

Con e ex Comisario di Polis, awendia Hefe di Warda nos Costa, a haya e informacion ey, no ta conoci ainda. Pa el a bay asina leu di pone e informacion riba papel y entreg’e na Ministerio Publico, ta indica claramente cu e tabata sigur di su mes. Ta conoci cu algun tempo atras, Polisnan di “Flex Team” a detene su mesun yiu homber pafo di dicho establecimiento, cu droga den su poder pa bende cu cliente.

Dor di e informacion oficial di Hassell, mesora Procurador General a duna ordo pa pidi un permiso di Hues Comisario pa por drenta e establecimiento. A uza Team di Aresto cu a yega na e sitio cu herment pisa pa kibra porta di e club y bay paden. No tabatin ningun hende trahando e ora ey, a busca tur caminda, cu ayudo di cacho, pero no a haya ni droga ni arma di candela. Gobierno awor lo mester paga pa e gastonan envolvi pa drecha locual cu e Polisnan a kibra ora di drenta e establecimiento. Esunnan deteni tabata sea canando eybanda of trahando riba e proyecto di hotel den cercania. Nan no tin nada di haber cu Olde Molen mes. A pasa nan pa Warda nos Costa pa verifica si nan tin permiso valido di estadia y/of di trabou.

E procedura normal, di acuerdo cu Polisnan, ta cu ora un informacion asina drenta, ta verifica, ta investiga y ora nan ta “sigur”, e ora ta pidi permiso pa drenta un luga. Prome cu esey mester “tap” telefon di hende, observa e situacion y asina por sigui menciona. Ta te despues cu ta sigur, e ora ta bay den accion. Den e caso aki a bula riba un “tip” y a opta pa no cana e caminda normal, sino bay den urgencia pa yega y haya net net nada.

Doñonan di e compania a lamenta masha e actitud di Fiscal di Ministerio Publico, cu a haya un informacion y a bula riba dje mesora sin verifica, sin investiga prome ni analisa ta di ken e keho of informacion ta bin. Ministerio Publico mester por tabata sa adelanta cu ta di masha aña caba e mesun Comisario di Polis aki a busca tur forma pa perhudica e club, dor di traha cantidad di Proces Verbaal pa orario di cierre, pa bringamento of cualkier problema pafo of paden di e luga. E daño causa awor na e nomber di e club, pa motibo di un informacion falso, awor lo mester ta motibo pa otro caso civil contra Gobierno. Mas cu un investigacion di Polis, e ta mustra awor un vengansa personal di un funcionario di husticia contra un compania priva.

Polisnan disgusta cu e asunto aki ta puntra nan mes awor: Si tabatin droga den e establecimiento mes, ta Warda nos Costa of e Departamento di Crimen Organisa di Polis lo mester sa? Minister Andin Bikker awor lo tin un otro reto mas pa surpasa cu e mesun Trudy Hassell aki, cu algun siman pasa mester a kita for di Migracion y mand’e pa Warda nos Costa so. Si no a haci e cambio urgente, trahadonan di Migracion lo a bay den accion, pa e forma di atende cu empleadonan y cu stranheronan. A move di Polis, a move di KIA, di Migracion….poco poco no ta resta mas departamento unda por aloca e persona. Sea mundo henter ta robes, of e tin un problema serio.