Diamars mainta tempran, sindicato SADA a tene un reunion extraordinario na e oficina principal di Cuerpo di Douane, caminda cu directiva a reuni cu su miembronan.
Intencion tabata pa laga e director dirigi algun palabra, pero por a ripara cu e miembronan no tabata interesa pa scuch’e.
E trahadonan tin un disgusto pa un carta cu a wordo manda pa e presidente. E presidente di SADA, Edward Maduro pa dirigi na e miembronan, pero nan no kier tende di director.
Director di Cuerpo di Douane, Ricky Croes, a splica cu ta algo cu a cuminsa di aña pasa. A papia cu presidente di e sindicato pasobra cu e tabata saca algun cos afo cu ta di Douane, cual ta e modo di traha di Douane. Cosnan cu no mag di sali.
A papia cune y a splik’e pa e tene su mes na e tarea y no saca e cosnan afo. Si kier papia cu prensa, ta bon pa representa e sindicato y papia over di derechonan di e trahadonan.
Pero pa locual ta e parti di trabao di Douane, e manera cu Douane ta traha, eigenlijk ta algo cu no por wordo saca.
E por tin su opinion, pero segun e director, ta bon pa e papi’e paden prome.
A yega di sinta na mesa caba. Un di e biahanan cu a bis’e pa bin cu punto, pasobra cu a tuma nota cu den prensa, hopi biaha ta bisa cu cos ta bayendo malo, ta bisa cu mester haci algo.
E director a dun’e espacio pa pone tur su puntonan riba papel, bin cu nan. El a haya un contesta di dje, cu ta si director a yama reunion, ta director tin cu pone punto. Contesta tabata naturalmente cu ta Maduro ta bay den prensa hopi biaha cu puntonan cu ta bisa cu no ta bon y gerencia kier sa kico e puntonan ey ta, pa wak si por haci algo cu nan.
Pero si no sa kico e ta, no por haci nada.
Constantemente director por a tuma nota den prensa di hopi cos, pero nan mes no ta tene nada. Of e ta bay den e caso aki, cual si ta su tarea, cual ta toca e derecho di e trahadonan. Tambe Douane tin e P&O cu por haci algo y por traha riba dje.
Gerencia di su banda ta haciendo hopi pa asina por cumpli cu tur e trahadonan den un bon forma. Naturalmente no ta tur ora den nan man, sino den man di otronan. Nan ta haya e sla aki, pasobra ta gerencia ta e prome aanspreek punt di e trahadonan. Pero si nan ta bringa pa tur e trahadonan tin tur cos cu nan tin. Segun cu por y conforme e espacio cu tin pa haci’e.
Kico ta bay pasa?
Pa loke ta e carta cu ta indica cu gerencia kier silencia e sindicato, e director a menciona cu e ta eroneo.
A raporta Maduro tabata den cuadro di su funcion como duanero. E no tabata tin nada di haber cu sindicato. E ta usa e parti cu e ta presidente di sindicato, pa asina e por vocifera su pensamento. Pero toch kier pa eseynan keda aden.
Ta bon pa nan por traha hunto y por yega cerca e leiding di Douane y por papia y wak kico por bay afo, na ki manera.
Su preocupacionnan ta preocupacionnan di gerencia, loke ta trata e trahado. Pa loke ta trata e beleid, pa loke ta trata e funcionamento di Douane mes, mester sigui cu e pensamento di e minister, cua minister cu ta, cua partido cu ta, di cua gobierno cu e ta, e minister ta duna gerencia e pensamento cu e tin pa loke ta funcionamento di douane y mester cumpli cun’e.
Gerencia ta cobra invoerrechten y accijzen. Pero banda di esey tin otro tareanan tambe. Ta traha cu otro stakeholdernan tambe manera kustwacht, polis, imigracion. Ta sinta hunto cu PG den un setting cu nan ta pensa y purba di yuda pa cera frontera, pa asina por proteha Aruba. Ta cosnan cu no por saca afo facil. Ta cosnan cu no por papi’e cu nan tampoco. Tin cu pensa riba e strategia si haci algo asina, director Ricky Croes a splica.
