Diadomingo anochi alrededor di 7:00 pm a tuma luga un caso di tiramento den Pos Chikito. Un persona den un auto marca Hyundai modelo Getz color shinishi a los por lo menos tres tiro riba un otro auto. A los tiro riba un Mitsubishi color cora numera A-73681.
Di acuerdo cu informacion compila na e sitio di suceso, e tiramento a tuma luga dilanti di Pos Chikito # 265. Un rato despues un persona a yega na Pos Chikito # 217-A informando cu nan a caba di los tiro riba dje. E no ta herida. Mas bien e tabata spanta si.
Tabatin perforacion di bala parti dilanti di e auto marca Mitsubishi. Pues, di e tres balanan, por lo menos un a alcansa e auto. E ekipo forensico di polis ta investigando e auto cu a haya bala y e area pa mas perforacion y pa check unda e “huls” nan a cay despues di e disparonan.
Ta bon pa menciona cu e bario di Pos Chikito ta den noticia hopi e aña aki pa motibo di tiramento. 20 di januari 2021 tabata ultimo biaha cu tiro a cay den Pos Chikito. Aña a habri cu un caso di asesinato na San Nicolas, di cual e sospechoso nan a gara den Pos Chikito. No a dura mucho, cu dia 15 di januari, den oranan di anochi, e tira un hoben mata cu bala den cabes. Dia e dia ey e situacion a keda tenso den e bario, entre gruponan contra otro. E siman ey na mas cu un ocasion a pidi polis pa presenta pasobra bisiñanan a scucha tiro.
Mescos cu na Aruba, na Corsou tambe e aña a habri cu hopi crimen tumando luga den cual ta uza arma di candela. Den hopi caso, si no ta mayoria, ta hobennan ta envolvi. Ta duna un impresion cu tin hopi arma circulando den comunidad bou di hubentud, un asunto cu autoridadnan mester tene masha bon na cuenta. Na momento di haci detencionnan, hopi biaha ta uza Team di Aresto, cu ta polisnan bon prepara pa efectua detencionnan peligroso den cual ta sospecha cu e sospechoso por ta arma.
Kisas mester revisa e leynan pasobra e castigonan den forma represivo no ta spantando e hobennan awendia, cu facilmente tin acceso na arma di candela. Di otro banda, e trabou preventivo den cual scol y mayornan ta hunga un rol escencial pa tene e muchanan leu di mal caminda y for di probema cu husticia. Kisas mester hasta limita y eventualmente prohibi hungamento di weganan di computer mucho violento of den cual ta uza arma pisa. For di un edad mucho hobennan ta expone muchanan na violencia y arma di candela, sea di berdad of via weganan di computer, pero cu lo por afecta nan actuacion despues ora nan bira mas grandi.
