Financiamento di gastonan den salud publico semper tabata un problema, tanto prome como despues di introduccion di Aseguro Medico General (AZV). Cu transcurso di tempo, a logra mehora esaki. Loke cu ta den discusion aworaki ta e parti cu e gastonan di cuido medico ta subiendo.
E prome reaccion di AZV riba esaki, segun e relacionista publico Solange Tchong, ta cu mester keda realistico. Si mira bon, semper e crecemento tabata entre 2 pa 3 porciento pa aña pa loke ta e gastonan di cuido medico. E comentarionan riba esey hopi biaha ta cu e gastonan ta halto of e gastonan ta hopi.
Sinembargo si pone esaki den perspectiva, den comparacion cu e paisnan rond di nos of mundialmente cu paisnan manera Hulanda of un Inglatera, loke por mira ta cu e crecemento di e gastonan di cuido medico na Aruba a subi di forma gradual. “E no tabata algo cu a bay for di sla y cu e ta mas bien cay den un categoria relativamente aceptabel compara cu otro paisnan, unda nos tin un porcentahe di entre dos pa tres porciento di crecemento,” e relacionista publico a splica..
Otro paisnan ta mira un crecemento di seis porciento bay mas ariba. Tambe AZV ta premirando cu tin hopi proyecto andando y e proyectonan aki na final di dia lo bay costa Aruba placa.
Tchong a sigui splica cu tin e parti di hospital cu a bin cu e edificio nobo, cu e renobacionnan. Tin e proyectonan di inversionnan haci na Instituto Medico San Nicolas, unda cu lo amplia e parti di servicio pa pashentnan di wowo y tambe e parti di oncologia.
Pues tin diferente proyecto cu ta duna e apreciacion cu ta bay tin un crecemento di e gastonan medico y e crecemento aki ta bay ta rond di 4 porciento premira, pa loke ta e gastonan di cuido medico.
Loke AZV di su banda a cuminsa haci caba, apesar cu cuido curativo ta e core business di e seguro aki, ta pa dedica atencion na e parti preventivo tambe. Dentro di esey tin sigur algun componente cu ta hunga un rol caba cu AZV ta concentrando riba dje.
Por ehempel algun aña atras a start e proyecto hunto cu Stichting BOB Aruba, unda cu ta haci deteccion di cancer di pecho cerca hende muhenan cu ta den un grupo di riesgo. Esta na cierto edad ta cuminsa alerta nan riba e control pa haya si di tempran si tin algo ta pasando pa asina por contraresta e situacion. Esey ta un forma di traha di prevencion.
Un otro forma ta cu AZV mes ta parti di plataforma promocion di salud, cu ta un grupo di shete stakeholder cu ta traha hunto pa asina conscientisa e comunidad riba tur e topiconan di salud. Pero principalmente riba tur kico abo mes por ehempel por haci riba e area di nutricion, cuido propio, higiena, etc. P’asina bo por yuda bo mes y p’asina AZV mes por yuda e parti of e areanan unda AZV como seguro no ta yega. SI wak historia, AZV a wordo institucionalisa pa e cuido curativo.
E parti di prevencion no por tapa wowo p’e. E ta importante, pero e no tabata defini den e ley. No ta kita afo si cu AZV tin un par di aña caba ta participando riba diferente proyecto den e area aki pa asina yuda cu comunidad por haci un cambio den e estilo di bida y asina ey por toch keda mantene un crecemento gradual, un crecemento toch responsabel di e gastonan di cuido medico.
Un otro parti cu AZV ta haci, ta keda monitorea tur loke ta contractonan cu dunadonan di cuido y tur unda ta posibel, ta bay purba di haci mehoracion.
Pa duna un ehempel, tin e idea pa bay cambia e sistema con ta paga e dunadonan di cuido, unda cu ta bay wak por ta mas e parti di prestacion, con hopi bo ta presta, pa asina por cubri esey.
Tin diferente idea cu sigur ta bay hunga un rol grandi den 2020, unda mas skerpi ainda, AZV lo bay monitorea loke ta e servicionan medico, loke ta e calidad, pero tambe loke ta haya pa loke ta para hunto, segun Tchong.
