“Mi ta aki na Den Haag, participando den un congreso riba 65 aña di “Statuut Koninkrijk” y mas oro den un paneldebat. Na mes momento recordando e hecho cu awe 12 di december ta exactamente 22 aña pasa cu mi a drenta politica na Aruba participando na eleccion y sacando mi mes e prome bes aki cu votonan preferencial (1538 voto) pa bira Parlamentario na 1997. Asina mi carera politico a cuminsa y danki na tur persona cu a y ta sostenemi den mi trabou y vocacion y muy en particular na mi famia”, asina el a publica un rato pasa riba su pagina di Facebook.
E publicacion ta bin tambe despues di por lo menos un siman di hopi “stress” cu si ta Ministeriabel of no. Entretanto a regla e locual tabata haci imposibel pa e bira Minister y como tal por spera cu asina e regresa di su biaha pa Hulanda, cu e lo huramenta como Minister di Infrastructura y Medio Ambiente di Aruba. E lo mester sosode mesora den e siman nos dilanti, sino despues Parlamento ta baha cu reces y no por procesa credencialnan.
Mientrastanto Otmar Oduber a celebra den bar awe marduga su final den politica. Cu amigonan, bodyguard y su sponsor principal, el a canta “My Way” di Paul Anka pa 12:00am, na momento cu su retiro a drenta na vigor. Oduber lo bay biba afo y ta planiando pa bay e siman aki caba pa pasa Pasco y Aña Nobo na su cas nobo.
