Trahadonan di Traimerdia diabierna mainta tabata na sede di Gobierno, Bestuurskantoor, pa scucha un contesta riba tur nan preocupacionnan pa cu existencia y vision pa cu Traimerdia. Mas ainda, con a para cu e promesa di Prome Minister Evelyn Wever Croes cu Traimerdia ta bay pasa pa Minister di Asuntonan Social Glenbert Croes.
Na salida e shopsteward di sindicato SEPPA, Claudia Martina (Assistant na Traimerdia), cu ta representa e trahadonan di Traimerdia, a bisa cu e resultado di e reunion a laga nan contento y satisfecho. “Por bisa cu e resultado ta hopi na nos fabor. Nos ta hopi contento cu e resultado.”
Ta for di januari, el a bisa, nan a bin ta luchando cu e asunto di Traimerdia riba su existencia y futuro di e trahadonan. Y awe porfin a keda cla. E decision cu a cay cu Traimerdia ta cay completamente bou di Minister Glenbert Croes. E decision a pasa den Conseho di Minister y el a bay via di un decreto ministerial. “Desde awe nos ta cay bou di Minister di Asuntonan Social.”
Segun informacion cu nan a ricibi, Traimerdia ta bay funciona manera semper, manera cu el a cuminsa 22 aña pasa. “Porfin, nos a lucha hopi y nos a logra nos meta,” el a bisa.