Awe diabierna, miembronan di Cuerpo Policial a asisti na un Santo Sacrificio di Misa na Christ Methodist Church na San Nicolas, pa asina duna danki na e trabao hopi importante cu nan ta haci pa comunidad y nos isla henter.
Semper ta bon nos por yega cerca di nos creador, apesar di e religion di e otro coleganan, Andrew Hoo, alto comisario di Cuerpo Policial, a expresa.
E ta bon toch pa refleha un dia y yama danki na e siguridad di nan como persona y nos isla. Segun alto comisario, na mundo polis ta para pa e parti di bon. Hopi biaha nan ta wordo critica na e manera di proceder. Pero na final di dia, ta nan tin cu yama bek.
Awe, diabierna, KPA a sinta keto un rato y sinti si esaki ta un vocacion pa nan. Tur ora ta bisa e coleganan, y hasta e nobonan, cu no ta un trabao cu bo ta yega haci pa e salario. E ta exigi hopi di e persona y di e famia hopi sacrificio.
Esaki tabata e momento pa refleha riba esey. Semper alto comisario ta hinca den cabes di coleganan cu duna respet pa haya respet. Y no ta di mes ta haya respet. Tin cu trata tur hende na e manera cu bo kier ta trata. Aki ta haya cu si tur haci esey, cual hopi ta haciendo caba, ta bayendo bon y e por bay mas miho.
Pueblo mester corda tambe cu nan ta ser humano. Bao di e uniform, ta keda un persona, mescos cu tur otro. Aunke cu ta regarda nan na un nivel mas halto, ta e parti cu nan a scoge pa esey y tin cu percura pa mantene tambe.
E trabao aki ta hopi dinamico. Mester bay cu e tempo y esey ta mustra cu leiding tin cu keda ahusta su mes y e polisnan tambe tin cu ahusta nan mes y bay hunto cu tempo. Tin biaha ta tiki fastioso, pasobra ora cu custuma cu un manera di traha, ta tiki dificil pa sali for di e zona di comfort. Ora cu leiding ta exigi pa sali for di e zona di comfort pa bay cu tempo, ta haya contratiempo.
Semper y cuando, cu motivacion y bon training y coaching ta logra esaki, e alto comisario a expresa.
