Desde mañan diahuebs atardi 5:00pm, Starbucks lo habri su porta oficialmente den e compleho nobo di entretenimento di nos isla, esta Gloria. Esaki ta di 5 establecimento di Starbucks na Aruba. Lo opera di dialuna pa diadomingo for di 7:00am pa 10:00pm.
Wanda Broeksema, Country Manager di Starbucks na Aruba y Corsou, a sigura cu e demanda pa productonan di Starbucks ta hopi halto, pa cual e mercado ta sigui fertil pa contesta riba e demanda aki. No solamente pa turistanan, pero tambe pa nos localnan mes.
E operacion di e Starbucks nobo ta den man di IMAX mes pero Starbucks ta garantisa e mesun calidad di producto y nivel superior di servicio. Tambe e ta ofrece e mesun specialnan vigente, igual cu tur otro Starbucks na Aruba. Clientenan, mescos cu na tur otro sucursal, tin espacio pa sinta disfruta di e productonan fresco prepara bo dilanti, reuni cu otronan of traha eyden, cu wifi gratis, den un ambiente sin igual.
“Esaki ta e Starbucks cu e diseño di mas nobo rond mundo. Aunke cu e diseño ta for di prome cu e reglanan di distanciamento social. E mueblenan ta moderno y ta duna un look diferente na locual a custuma cu ne”, asina Wanda Broeksema a splica. Asina mes, tambe den e diseño nobo, ela elimina e seccion “self service” pa Bo mes prepara bo thee of koffie na smaak. Cu e reglanan nobo, e partnernan mes lo pasa bo sucu of cualkier otro producto pa añadi y haci bo bebida mas dushi ainda.
A funda Starbucks na Merca desde 1971 y a crece no solamente na cas, sino cu awendia ta opera den mas di 70 pais y tin mas di 32 mil Starbucks habri rond mundo. Na Aruba nan a habri desde 2009 den Renaissance Marketplace, despues a habri den Renaissance Mall, sigui pa Paseo Herencia Mall, den lobby di Marriott Resort y desde mañan tambe na The Movies IMAX @ Gloria.
