Ex-ministernan Benny Sevinger y ing. Mike de Meza a reacciona awe riba e declaracionnan politico haci ayera pa e sindicalista Diego de Cuba di Sindicato di Trahadonan di Aruba, STA, relaciona cu e problemanan na Serlimar. STA ta acusa Sevinger y de Meza di ta e culpabelnan di e problemanan cu tin awe na e compania nacional di recogemento di sushi. Ambos parlamentario a reacciona fuerte contra de Cuba, acusand’e di ta liga na MEP y cu ta pesey e ta purba libra Otmar Oduber y Evelyn Wever di ta e berdadero culpabelnan di caba cu Serlimar of permiti pa POR caba cu ne den forma delibera.
Di otro banda, nan a conseha e minister nobo di naturalesa y medio ambiente pa bin parlamento pa e haya yudansa. E dos ex-ministernan ta sinti cu e minister nobo ta hogando den un glas di awa. E ta papia di un debe di 21 miyon florin cu e compania tin, di cual 14 miyon ta na gobierno mes, den forma di belasting atrasa cu a retene di e trahadonan sin cu a paga DIMP.
Benny Sevinger a duna minister Arends un tip, pa e yega parlamento cu un peticion pa “kwijtschelding” di e debe na gobierno y asina e ta resta 7 miyon so pa paga ainda. Ta paga e debe ey pocopoco den 4 aña y tur hende ta keda contento. Y asina facilmente por elimina e proteccion cu a pidi corte awo pa evita bancarota.
Un cos si, no por bay sigui haci mas debe si, sino meste sanea e compania, cobra e usuarionan y percura tambe pa gobierno paga pa tur e servicionan cu ta solicita di Serlimar.
Tanto Sevinger como de Meza a lamenta si, cu awor minister Ursell Arends ta papia di corupcion pero e no ta menciona cu ta Otmar Oduber a chica e compania aki, cu consentimiento di minister-president Evelyn Wever-Croes. Ta lamenta cu e ultimo aki nunca a yega na porta di e compania, ni pa sa kico ta pasando of con e por yuda. A laga e compania sangra y awor kier pretende cu ta AVP tabata e problema. A corda Diego de Cuba cu MEP a asumi poder na 2017 y pandemia a yega na maart 2020, pues pa tres aña largo ex-minister Otmar Oduber a huur edificio caro, a lease trucknan nobo caro y sin mester, a haci campañanan publicitario cu a fracasa pasobra cu tur e propagandanan, a resulta cu menos hende tabata paga cu antes y…a nombra director cu e por a manipula eyden.
E sponsor di carnaval di ex-minister Oduber, esta Caribbean Trucking a haya varios contract lucrativo, cobrando prijs hopi halto, pa haci trabounan cu nan no tin conocemento ni experticio aden. Riba dje, a forsa pa kira contract di e incinerator cu Johnson Enterprizes djis pa pas’e pa su bisiña amigo. Te awe e incinerator no ta funcionando, pa mustra mas prueba cu henter e asunto ta hole na corupcion y complace sponsornan yega na e mandatario.
