Diadomingo, 27 di november, Partido AVP den colaboracion cu su organisacionnan a bolbe trece hopi hende di nos comunidad hunto pa un bon causa. Den un ambiente di “haci bon pa nos pais” un grupo grandi di hoben y grandi a aglomera den area di Grapefield/Boca Grandi pa haci e area limpi. E tabata grandioso Beach Clean up Event cu meta pa mantene e nos costa di Boca Grandi/Grapefield limpi y alabes duna e mensahe cu ta nos mes mester cuida nos pais.
El a bira un mainta placentero unda cu famia, amistad y colega a bini hunto y comparti un rato ameno, mientras cu nan tabata participa na un accion positivamente pa nos Pais: un accion di bon comun. E “Think Common Good Beach Clean up” a mustra den forma concreto kico Partido AVP ta sembrando den curason di nos comunidad: haci bon pa nos tur (Bon Comun) como criterio y guia pa tur loke nos haci ta cu e bienestar general na prome luga.
Lider di Partido mr. Mike Eman acompaña pa e parlamentario- y candidatonan tambe tabata presente pa comparti e importancia di e evento y e pensamento di bon comun. Partido AVP ta cultivando e pensamento di e Bon Comun den nos comunidad pa e sirbi comun un forma basico di pensa pa henter nos pais. Despues di a organisa un exitoso simposio tocante e “Restauracion di e Bon Comun”, a logra inspira nos comunidad pa practica e Bon Comun tambe diasabra.
E participacion di un grupo grandi di mucha, hoben, adulto y hasta nos grandinan na e Beach Clean up event, tabata muestra cu e tema di e “E Bon Comun” pa nos comunidad pa cuminsa crece. Personahe prominente den nos comunidad, manera e campeon mundial Sarah Quita Offringa a sostene e evento di ‘Think common good beach clean-up.’ Y no por nada. E ta importante pa den e contexto preocupante cu nos comunidad ta bibando aden, pa tin e momentonan manera esaki pa inspira, motiva y crea speransa nobo den nos comunidad.
Desapunta den e gobernacion actual, unda mucho hopi hende den nos comunidad ta perde speransa den e posibilidad di un miho futuro, AVP ta rebiba e compromiso cu e “Bon Comun” ta e caminda pa cana pa transformacion di nos Pais den uno mas husto y bon pa nos tur. ‘Think Common Good’ ta un continuacion y profundisacion di AVP su prioridad pa Aruba. E necesidad pa un renobacion di nos sistema economico, politico, social ta bira dia pa dia mas bisto. Hopi mester wordo haci den e proximo gobernacion pa crea atrobe un motivacion nacional pa saca nos Pais padilanti y saca nos pueblo for di sufrimento. E motivacion aki ta inicia cu e pensamento di e Bon Comun, cu ta reta nos tur pa pone e interes y deseonan di nos comunidad na prome luga. Pa nos por realisa un Bon Comun pa henter nos pais, cambio di gobernacion ta necesario.
Partido AVP ta preparando pa e proximo gobernacion y lo percura pa implanta un guia moral den e manera cu nos ta duna contenido na nos sistema economico, politico, social pa asina esakinan por ta na servicio di nos comunidad. Diadomingo nos por a mira un multitud di hende homber y hende muhe cu a lanta determina pa cuminsa construi e caminda pa un Gobernacion di e Bon Comun: un Aruba cu ta bon pa nos tur. Partido AVP ta gradici nos comunidad cu a participa na e evento di “Think Common Good Beach Clean up.”
