AVP: Cu dialogo por yega na proposicion

Den un nota amplio partido AVP a presenta un ruta alternativo pa yega na varios  proposicion pa fortifica nos pais y sigura un recuperacion socio-economico pa henter Aruba. Esaki mester ta base pa habri un dialogo di nobo dentro di Reino y dentro di cada pais di Reino. Ta door di un proceso di dialogo cu tur cu lo ta afecta door di e maneho, cu AVP ta mira cu por yega na proposicionnan cu ta wordo carga door di parti grandi di nos pais. Pasobra ta trata di esencia di calidad di bida di nos comunidad.

Den un rueda di prensa henter e fraccion encabesa pa Mike Eman, a presenta e nota aki cu lo ta e posicion di AVP den e rapport di Staten di Aruba cu lo bay pa parlamento y gobierno di Hulanda. Mike Eman a enfatisa cu henter mundo ta den un reflexion riba e rumbo cu mester scoge despes di e efectonan grave di pandemia. No ta Reino so, no ta Aruba, Curaçao y Sint Maarten so, pero practicamente tur pais na mundo tin cu haci ehecicio grandi pa contempla riba nan modelo socio economico, nan structura di educacion y salud y hopi mas faceta cu ta determina e calidad di bida di nan ciudadania. Temanan grandi di cambio cu no wordo consulta cu pueblo, cu ta wordo traha den un camber cera y acorda no ta bay tin e “draagvlak” y participacion rekiri.  

Pa AVP e consenso cu ta bisa cu tin riba e proposicionnan di COHO, RAFT y Landspakket, no ta un consenso real. Mike Eman: “Un consenso real no ta ora un gobernante su so ta firma pa henter un pais, sin cu tabata tin un debate y participacion cu parlamento, cu gremionan, cu cada uno den nos comunidad riba locual nos ta mara nos na dje”. Segun AVP ta ora e proposicionnan ta wordo traha hunto y carga door di parti amplio di tur comunidad, Bo por yega na concsenso real. Awor aki trahadonan di Aruba, e pashentnan, e maestronan di scol no sa kico ta bay sosode. Pesey AVP ta propone un ruta di dialogo, AVP ta propone un ruta alternativa.

Lider di AVP, Mike Eman y Ryçond Santos Do Nascimento a pone atencion amplio na e dialogo cu AVP ta propone y con nan ta wak cu e mester sosode den cada pais di Reino y despues entre paisnan di Reino. Pa ilustra e urgencia di un proceso di dialogo, a mustra riba e problema cu tin na Hulanda y Europa awor aki cu ta un distancia entre Union Europeo y ciudadanonan. Eman a cita di un rapport, “De wil van het Volk, Erosie van de democratische rechtsstaat in Europa”. Esaki ta un rapport cu un conocido experto constitucional den Reino encabesando e comision di Commissie Mensenrechten a contribui na su contenido, esta Prof.dr. E.H.M Hirsch Ballin. Den e rapport aki ta mustra riba e consecuencia di falta di dialogo den e contexto di Union Europeo cu a conduci na “een proces van vervreemding [zien] van burgers van de instituties waarop de democratie en de rechtsstaat zijn gestoeld”. E rapport ta splica con door di falta di scucha e bosnan di inkietud a crea distancia y falta di aceptacion: “De kracht van de politiek-ideologische keuze voor liberalisering van markten en het reduceren van beschermende structuren was echter zo groot, dat de politieke mainstream maar heel weinig van die tegengeluiden in zich opnam”. Eman ta enfatisa e fragmento aki mustrando cu imposicion di escogencianan cu un color ideologico sin ta habri pa e preocupacionan a crea e distanciamento aki den Union Europeo. 

Loading…

Taking too long?

Reload document

| Open in new tab

Download [1.35 MB]

Eman a cita tambe un otro fragmento di e rapport di Union Europeo cu ta mustra cu a busca consensus, mescos cu a pasa cerca nos, na e nivel mas halto, pero nunca cu e doñonan di curpa, e pueblo mes: “De politieke gerichtheid op consensus is op zichzelf niet verkeerd, maar begint als het ware te vroeg in het verloop van de democratische wilsvorming, namelijk nog voordat de tegenstellingen herkenbaar en doeltreffend waren gearticuleerd”. E comision pa adresa e situacion na Union Europeo a mustra kico ta pasa ora tin falta di dialogo. E eror aki no tin mag di sosode na Aruba. AVP ta haci un yamada cu su nota na Eerste Kamer y Tweede Kamer di Hulanda pa habri e dialogo pa yega na consenso den Reino. AVP ta propone den su nota un ruta alternativa. Pa e motibo aki AVP ta tuma e iniciativa pa organisa e dialogo cu pueblo y cu e gremionan na Aruba. Un dialogo nacional for di cual lo mester sali proposicionnan cu Aruba lo por hiba mesa cu Hulanda pa remplasa e proposicionnan cu tin riba mes awor aki. AVP a tuma desicion cu ta bay papia cu henter Pueblo pa yega na proposicionnan cu ta wordo carga den Pueblo.

Ryçond Santos Do Nascimento a evalua e COHO, RAFT y Landspakket for di punto di bista di Statuto di Reino y a mustra riba e echo cu e forma cu a yega na e proposicionnan y e forma di tuma desicion, no ta conforme cu Statuto di Reino. Tambe el a mustra cu e dialogo mester ta e base di cualkier proposicion pa e ta realmente democratico.