Diadomingo mardruga net despues di 2’or, un auto Chevrolet AVEO cu tabata riba caminda di Santa Cruz bayendo pariba, a perde control net un tiki prome cu e rotonde di Santa Cruz y a dal contra un palo di luz.
E impacto tabata asina fuerte cu e wayanan di corriente a cuminsa spart candela feroz te cu tabata tin hende a kere cu ta vuurwerk nan tabata tira. A avisa Polis mesora door di algun hende cu a core yega wak. Mirando con e stuur den e auto a keda tur dobla, a yama Polis un biaha mas pa asina avisa nan cu kisas e chauffeur femenino den e auto, por tin sla paden. Manera cu polis a yega, a pone e chauffeur supla, cual a mustra cu e tabata tin un tiki dimas bebi.
Apesar di esaki, polis a pidi pa paramediconan revisa e chauffeur prome cu a hink’e den auto di polis, pa finalmente bay cun’e warda. Mirando e circunstancia di e accidente, a yama personal di Elmar, pa asina atende cu e wayanan cu a cay, lagando asina algun cas sin coriente.
