Diamars den careda di 5’or di atardi, Polis a ricibi yamada cu un auto lo a cay den greppel riba caminda grandi banda di Superfood. Na yegada di patruya, a papia cu e chauffeur femenino di e auto pa haya sa e causa di e accidente aki.
For di algun persona na e sitio a bin compronde cu e dama chauffeur a declara cu e tabata coriendo riba Sasakiweg direcion zuid y un tiki prome cu yega e rotonde di Superfood y den pleno careda, un otro auto lo a mishi cu e bumper patras di su auto. Esaki a causa cu el a perde control riba su vehiculo y a baha for di caminda y a cay den greppel.
Aunke na prome instante a laga sa cu no tabata tin herido, despues toch a solicita ambulance pa bin na e sitio. Lamentablemente a constata cu hopi chauffeur no tin e pasenshi y ta pasa cu algun velocidad memey di e auto accidenta y Polis, personal di ambulance y e chauffeur herida na otro banda, causando un ola di awa ta baña nan. Polis varios biaha a hala atencion di e diferente chauffeurnan y nan comportacion den trafico. A pidi pa takelwagen pa saka e auto (un Nissan March) for di e greppel, mientras ambulance a transporta e chauffeur pa hospital pa un miho check up medico.
