Pa algo pasa di 5:20pm a bati alarma pa un accidente serio riba Sasakiweg, net poco prome cu e famoso rotonde dilanti Superfood. Ey Polis a topa un auto tur kibra, chauffeur pafo di e auto tira na suela, yorando di hopi dolor. A pidi sosten di Ambulance cu urgencia pa por brinda asistencia.
Investigacion na e sitio a indica cu e auto marca Suzuki, modelo Swift, color berde, numera A-62627, tabata coriendo cu velocidad halto. Dado momento el a baha caminda den banda y a purba subi bek. Den e maniobra el a dal un borchi di trafico y bolter riba caminda. E impacto tabata asina fuerte cu e auto a saca e chauffeur afo via e bentana di patras (backshield).
Na e sitio testigonan a baha pa duna un man mesora. A yuda cera caminda y papia cu e victima mientras ta warda riba Ambulance. E chauffeur mes no a bisa mucho di kico a sosode cu a pone perde control di e forma ey.
E auto a sufri hopi daño, cu sla dilanti ora el a dal e borchi di trafico y riba dak dor di a bolter cu e auto. No tabatin mas auto envolvi pues e daño a keda entre e auto y borchi di trafico. E Suzuki Swift a sufri basta daño material.
Polis di trafico a presenta na e sitio pa conduci un investigacion riba con e chauffeur a perde control y bolter cu e auto. Ambulance a opta pa transporta e victima pa Hospital pa por haci un chekeo medico cune. A tene e caminda cera pa un rato, pa por haci e investigacion necesario.