Diaranson anochi, pa mas of menos 9:09 PM, polis a bay cu maximo urgencia dilanti Shahai Take Away na Santa Cruz. A drenta informacion cu auto a dal un peaton.
Na yegada di polis a bin topa cu un persona gravemente herida. Ambulance a presenta cu urgencia pero no por a haci nada mas. Pa 9:45 pm dokter Scholten a constata morto di Esteban Maduro, naci na Aruba 2 januari 1942. Su nomber di cariño ta Steve.A pidi slachtofferhulp pa presenta tambe pa atende cu e famia. A cera caminda pa trafico y desvia tur auto. Departamento di trafico a presenta pa investiga.
A cuminsa na busca testigo pa tuma declaracion n’e sitio. No ta prome peaton cu auto ta dal y ta fayece na e sitio di accidente.Peaton pa un of otro motibo ta crusa sin pone bon atencion cu consecuencia cu auto ta dal nan y cu resultado fatal manera diaranson anochi atrobe.
Varios unidad di polis presente y tambe ambulance tabata na e sitio. Tabata un auto Suzuki Swift, numera A-65650 a alcansa e peaton, cu e consecuencianan ya conoci. Polis a test e chauffeur pa alcohol y a resulta cu e no a bebe nada. Tin di remarca cu e luga ta hopi scur y hopi auto cu ta circula riba e caminda aki, ta core riba velocidad basta halto. Cu morto di e cabayero aki ta suma e di shete morto den trafico riba nos isla. Palabra di forsa y condolencia ta bay p’e famianan di e fayecido.
