Tin dos siman cu Aruba ta habri pa Latino America. Manera a anuncia na momento di apertura, ta habri pa Latino America, cu excepcion di residentenan di Peru y residentenan di Venezuela. Esaki en berdad a crea cierto confusion, entre otro pa Peruanonan.
Ronella Tjin Asjoe-Croes, CEO di Aruba Tourism Authority (ATA), manera anuncia, tabata den contacto cu e representante na Aruba di e Consul di Peru na Panama. No solamente ATA, pero tambe Departamento di Aviacion Civil, tabata tin e contacto ey.
E excepcion aki ta solamente pa residentenan di Peru. Esey ta nifica cu un residente di Aruba, cu tin famia na Peru, por continua cu su biahe na Peru y por regresa Aruba tambe. Un residente di Aruba cu ta na Peru caba, por haci un biahe y bolbe Aruba. E excepcionnan no ta conta pa residentenan di Aruba.
Manera indica den e prome siman di anuncio caba, a ripara cu tabata tin confusion. A clarifica esaki. A acerca aerolineanan atrobe pa clarifica esaki mirando cu ta nan y nan ekipo, na e momento ey ta deal cu diferente clientenan y por en berdad duna informacion incorecto of tuma pasonan incorecto.
Un biaha mas a tuma nota di casonan recien cu a bin dilanti y a bolbe haci un esfuerso, haciendo esey actualmente, pa contacta esnan concerni pa asina e ta cla pa un y tur, cu residentenan di Aruba, saliendo for di Peru por aborda un vuelo y ta permiti pa efectua nan biahe.
Pa Venezuela a bin ta traha riba un maneho, unda cu lo por respeta e hecho cu tin hopi Venezolano cu tin condominium, cu tin timeshare, cu tin propiedad, inversion na Aruba. A bin ta traha, parti di loke Crisisteam a bin ta traha riba dje tambe, riba un maneho unda cu lo por permiti e Venezolanonan residentenan di Venezuela cu tin propiedad na Aruba, pa nan por drenta Aruba.
Esaki ta den tapara. Ta trahando riba dje y esnan concerni pronto lo sali cu mas informacion tambe referente esaki y kico ta e proceduranan tambe.
