E aña aki un biaha mas Aruba Sport Unie a tene nan ASU Olimpiade 2018, unda cu mas federacion a organisa torneo. Diadomingo atardi a tuma luga e clausura di ASU Olimpiade, unda cu a reconoce algun persona cu a of ta un pilar den e mundo di deporte.
A haya un olimpiada di mas o menos 30% y pa ASU esaki tabata algo bunita cu e cantidad a crece, unda cu cada aña ta haya mas acerca. Actualmente a bay pa 22 federacion, cual tabata hopi bon pa ASU pero specialmente p’e muchanan y deportenan mes.
Mayoria federacion a organisa actividadnan pa hobennan y nan a bay hopi bon. President di ASU, Gerald Franca, a presencia algun di e torneonan y otro miembronan di directiva tambe a haci presencia. Tur cos a bay bunita y organisa, el a bisa.
ASU Olimpiade a cuminsa 63 aña pasa den Joelaveist Ballpark, cu antes tabata Lago Sport Park. Ex president di ASU, Oscar Henriquez, a cuminsa cu ASU Olimpiade e tempo ey. Antes nan tabatin un sistema diferente, unda tabata saca atleta di aña, tabata saca reina di aña deportivo. “Esakinan ta actividadnan cu otro seccion a absorbe e facilidadnan ey. Nos a haci e parti deportivo”, el a expresa.
ASU a percura pa haci un apertura y clausura. Tambe nan a percura cu e federacionnan haya cooperacion di nan tanto den medaya como facilidad. A duna nan algo acerca pa yuda nan cu nan gastonan. Otro aña un biaha mas ASU lo organisa e olimpiada. E ta un actividad cu a mara su mes na e structura di ASU y lo sigui organisa esaki, unda cu ta organisa otro actividadnan manera Ban Move Camp.
