Den e ultimo programa di e competencia reality Holland’s Got Talent, un talento crioyo a sa di impresiona e hurado lo suficiente pa el a haya nan ‘Ja’ y asina pasa pa e siguiente rond. Ta trata di Kevin Boekhoudt, un hoben Arubiano di 24 aña, kende a presenta un rutina di baile di salsa.
Loke a haci cu Kevin a resalta ta cu, na luga di haci un baile den pareha, manera sa wak hopi biaha cu e genero musical aki, el a opta pa haci e coreografia su so. El a splica e huradonan cu un presentacion tipo solo ta yama shine.
Durante un minuut y mey, Kevin a realisa combinacion di pasonan tin biaha hopi lihe y complica, mientras otro biaha e ta dal para abruptamente pa riba e ritmo di e musica. A pesar di confesa cu nunca a yega di mira un baile di salsa solo of shine, e huradonan a keda lo suficiente complace cu e capacidad di Kevin, cu unanimamente a dicidi di dun’e nan aprobacion.
Kevin tin un experiencia amplio den bailamento. E ta aparece su mes, pero tambe realisa e coreografia pa video clip di varios artista na Hulanda. Ta keda pendiente awo pa mira ki dia lo ta e proximo presentacion di Kevin den e programa di television cu ta goza di gran sintonia na Hulanda. 24ora.com ta desea Kevin hopi exito!
