ATA: Arte publico ta mustra e rikesa di creatividad di nos yiunan di tera

Miriam Dabian ta director di oficina di turismo di Aruba na Bogota, Colombia. Durante e encuentro na e tayer di Gilbert Senchi, e tambe tabata presente pa compaña Minister Xiomara Maduro pa aprecia e arte publico cu e artista a traha. Dabian ta sinti cu arte publico ta hopi importante pa Aruba, mas ainda pa nan cu ta promove Aruba den Latino America. Dabian a subraya cu arte publico ta mustra e rikesa di creatividad di nos yiunan di tera.

ATA Colombia

E turismo di Latino America ta conociendo un aumento drastico pa cu Aruba. Pocopoco ta yegando na e grado di ocupacion di stoel di aña 2019, cual tabata un aña record den cantidad di bishitante pa Aruba. Ta mira cu tin interes grandi di varios aerolinea pa cu e ruta directo pa Aruba. Na october proximo e aerolinea Wingo ta cuminsa bula directo for di Medellin pa Aruba, ya caba Sarpa tin tres vuelo pa siman y por spera ampliacion di vuelo di e aerolineanan Avianca y Copa Airlines.

Miriam Dabian

Dabian durante e entrevista exclusivo cu 24ora.com a conta cu despues di cuarenta aña, e lo baha cu pensioen na november proximo. E cuarenta aña no tabata facil pero a traha cu hopi cariño y dedicacion. Miriam Dabian a traha diestres aña na Colombia den pasado, e tabata un di e pioneronan pa habri e oficina di turismo di Aruba na Colombia, djey a bin bek Aruba, a sigui cu dies aña di labor na Caracas, Venezuela y actualmente e tin shete aña bek na Colombia. “Mi ta satisfecho, mi a cumpli”, asina Dabian a duna bisa Nelson Speed Andrade di 24ora.com durante e entrevista cu a tuma luga na Sur di Bogota. Ora e baha cu pensioen, e lo comparti su bida tanto na Aruba y tambe Colombia. Por spera un cobertura di 24ora.com durante e encuentro di despedida cu lo tuma luga na Bogota, Colombia.