For di Madre Patria Hulanda, 24ora.com a ricibi e grato noticia cu e Arubiano Ashley Peternella, di 27 aña ta bay representa Hulanda na Manila, Filipinas, dia 6 di Augustus, como Mister World Nederand 2019.
Na comienso di juli Brenda Muste a keda corona como Miss World Nederland 2019, den e restigioso De Koning Events na Amsterdam, y awo e ta duna un bon bini na Ashley, den e famia di World Nederland.
Ashley ta naci na Oranjestad, Aruba y ta biba na Amsterdam. El a studia na e Universidad di Maastricht y a logra su bachelor den Knowledge Engineering & Computer Science. E hoben aki a sigui despues di su estudio den modelahe y presentacion.
Dia 6 di augustus, Ashley lo bay competi hunto cu mas di 100 otro participante pa e titulo di e homber di mas nechi na mundo. Pa tres siman largo, Ashley ta bay haya un escenario pa asina e presenta su mes como Mister World Nederland y di e manera aki demostra su mes den e retonan cu e ta bay tin su dilanti.
Ashley tambe ta presentador na e canal Europeo OUTtv, caminda cu e por biba su pasion pa presentacion. Riba dia 30 di juni ultimo, Ashley tabata tambe ganado di e programa di television “The Big Audition”, cu ta transmiti na NPO3.
Ashley lo sigui cu su exito como Mister World? Sigui Ashley riba Instagram via mrworldnederland y tambe via Facebook Mister World Nederland.
